Мамыр айының 20-22 күндері Астана қаласында «Жас қанат — 2016» жас орындаушылардың республикалық байқауы өтті. Биыл 25-ші мәрте ұйымдастырылған өнер додасы ел Тәуелсіздігінің 25 жылдығына арналыпты. Еліміздің әр өңірінен келген 14 жас талант сынға түскен өнер бәйгесінде семейлік жас дарын Парасат Отанның бағы жанып, байқаудың бас жүлдесін жеңіп алды. Жеңімпазды жерлестері құрметпен қарсы алып, 25 мамыр күні арнайы баспасөз мәслихаты ұйымдастырылды.
Байқаудың мақсаты ел ішіндегі өнерге қабілеті бар жас дарындарды анықтап, олардың шығармашылықпен айналысуына қолдау көрсету болып табылды. Айтулы сайыс, негізінен, үш кезеңнен тұрады. Бірінші айналымда Парасат халық әні «Жорға тайды» орындапты, әділ қазылар алқасы құрамында болған белгілі музыка зерттеушісі Юрий Аравин оны жоғары бағалаған екен. Ал екінші айналымда жерлесіміз әнсүйер қауымға испан тіліндегі «Махаббат тарихы» әнін ұсыныпты. Бұл ән де танымал эстрада жұлдыздары Нұрлан Абдуллин, Медеу Арынбаев және Жанар Дұғалова сынды өнер майталмандарының көңілдерінен шыққан екен. Ал шешуші ақтық мәреде жас әнші «Жорға тай» композициясын тағы бір мәрте орындап, сонымен қатар Италия елінің әнін классикалық мәнерде шырқап, халықтың зор қошеметіне бөленіпті.
— Мұның алдында осы «Жас қанат» байқауының облыстық іріктеу кезеңі Өскемен қаласында өткен еді. Сол жерде өнерімді көрсетіп, нәтижесінде ақтық сынға жолдама ұтып алған едім. Астанадағы шешуші кезең маған оңайға түскен жоқ. Себебі еліміздің әр өңірінен келген менен еш осал емес қатысушылар болды. Олардың да еңбегін атап өткен жөн. Әділ қазылар бір ауыздан жеңімпаз болуға мені лайық деп таныған сәтте, төбем көкке жеткендей болды. Классикалық мәнерде айтқан әнімді әйгілі опера әншісі, еліміздің мақтанышы Нұржамал Үсенбаева жақсы бағалап, қатты әсер алғанын жеткізді. Әлі де өз жеңісіме сенбей тұрмын десем де болады. Осылай күллі Шығыс Қазақстан облысының абыройын бәсі мықты өнер аламанында қорғағаныма қуаныштымын. Бұл ретте маған қолдау көрсеткен ШҚО әкімдігіне, оның ішінде Мәдениет, мұрағаттар және құжаттама басқармасына зор алғысымды білдіргім келеді. Сондай-ақ өзім қызмет ететін облыстық Әміре Қашаубаев атындағы Семей мемлекеттік филармониясының ұжымына, оның басшысы Адай Азаматовқа ризашылығымды білдіремін. Әрине, жеңіске жеттім деп тоқтап қалатын ойым жоқ. Керісінше, енді шығармашылығымды шыңдауға күшімді жұмсайтын боламын. Алдағы уақытта эстрадалық жанр арқылы, қазақтың халық әндерімен қатар, өз жеке туындыларымды да кеңірек насихаттауды көздеп отырмын. Барлық жерлестеріме тағы бір рет алғысымды жеткіземін,- деген жылы пікірімен бөлісті «Жас қанат» байқауының жеңімпазы.
Баспасөз мәслихатында сөз алған облыстық Әміре Қашаубаев атындағы Семей мемлекеттік филармониясының әншісі Қадылбек Омаров жас таланттың болашағы зор екенін айта келе, филармонияның атынан жеңімпазға 40 мың теңге көлеміндегі сертификатты табыс етті.
Жақсылық МҰРАТҚАЛИҰЛЫ, «Семей таңы»
