Жылдағы қалыптасқан дәстүрге сай биылғы жылы да мамыр айының 25-і күні қаламыздағы барлық мектептерде соңғы қоңырау үні сыңғырлады. Шаһардағы барлық білім беру ордаларында мектеп оқушылары сап түзеп, ұстаздар қауымы жыл қорытындысын жасап, ал түлектер алтын ұяларымен қоштасты. Бұл игілікті шара Семейдегі физика-математика бағытындағы Назарбаев Зияткерлік мектебінде де салтанатты түрде орын алды.
Айта кету керек, білім айдынында желкенін керген аталмыш мектепте биыл алтыншы мәрте күміс қоңырау үні сыңғырлады. Бұл күн, мұғалімдермен қатар, мектеп бітіруші түлектер үшін де ерекше маңызды екені анық. Аталмыш салтанатты шарада мектептен түлеп ұшушы жас өрендерге ерекше қошемет көрсетілді. Оның себебі де бар: Тұңғыш Президент атындағы білім ордасын тамамдаған ұл-қыздар әлемнің әр түкпіріне жол тартып, жоғары оқу орындарына түсуде, сөйтіп, елімізге білікті маман, керекті кәсіп иесі болып оралуда. Мұндай ізгі үміт биылғы түлектерден де күтілетінін мектеп директоры Бағдан Қайыржанов өзінің жүрекжарды құттықтау лебізінде айтып өтті.
Жалпы, аталмыш білім ордасындағы 2015-2016 оқу жылы да жоғары жетістікпен аяқталыпты. Мәселен, оқытушылық құрам инновациялық игіліктерді игере отырып, білім берудің жаңа технологиясын оқу процесіне сәтті енгізген. Сонымен қатар шәкірттер түрлі деңгейдегі байқаулар мен білім сайыстарында биіктен табылыпты. Нақтырақ айтсақ, халықаралық интернет арқылы өтетін олимпиадада ең үздік команда атанған. Бір бұл емес, 11 мен 12 сыныптарды қоспағанда, 72 оқу озаты шығыпты. «Алтын белгіге» бір, ал үздік аттестатқа 4 оқушы үміткер екен. Мектеп бітіруші түлектердің 75 пайызы көктемгі емтиханды ойдағыдай тапсырыпты. Яғни, түлектер Назарбаев университетіне түсе алады. Сонымен қоса биылғы оқу жылында 26 грант иегері анықталған. Оның ішінде қазіргі күннің өзінде әлемнің алдыңғы қатарлы оқу орындарының студенті атанғандар бар. Атап айтсақ, Карина Бибатырова Гонкгонг университетінің студенті болса, Самал Дәуітбаева Оңтүстік Кореяның Юн Сэй халықаралық университетінің студенті саналады.
Мектеп мүдірі Бағдан Тоқтамысұлы сонымен қатар халықаралық және республикалық олимпиада жүлдегерлеріне де тоқталып өтіп, өз құттықтауын жеткізді. Олардың арасында нағыз дарын иелері көп екен. Осылайша, мектеп мерейіне тоқталған білім ордасының басшысы өткен оқу жылының түлектері бағындырған биіктерді де мақтанышпен айтып өтті. Атап айтсақ, білім ордасының екі түлегі әлемнің ең жоғары оқу орны саналатын Нью-Йорк университетінің студенттері атаныпты. Осыдан соң, әдеттегідей, оқу озаттарын салтанатты түрде марапаттау рәсіміне кезек берілді. Мектеп директоры арнайы грамоталар табыс етіп, барлығына да оқуда табыс, жеке өмірлерінде жоғары жетістіктер тіледі. Соңғы қоңырау салтанаты ән мен бимен өріліп, ата-аналар қауымының, ұстаздардың ақжарма ақ тілектерімен көмкерілді. Бұл күн әсіресе аталмыш білім ордасы түлектерінің жадында мәңгілікке сақталатыны анық.
Сөз орайында айта кеткен жөн. Ағымдағы оқу жылын Семей өңірі бойынша 1539 түлек тамамдап отыр. Мектеп партасымен қоштасқандар арасында 15-і үздік аттестатқа үміткер болса, 37-і «Алтын белгіден» дәмелі. Қалалық білім бөлімі берген мәліметке сүйенсек, ҰБТ сынағын тапсыруға түлектердің 63 пайызы өтініш білдіріпті. Яғни 970 түлек айтулы мәреде бақ сынамақ. Сонымен қатар, қалалық білім бөлімінің басшысы Наталья Фесенко айтып өткендей, 26 мамыр, яғни аптаның бейсенбісі күнінен бастап мектеп жанындағы жазғы лагерьлер өз жұмысын бастайды. Бұл орайда биылғы жылы зор жетістік бар. Себебі барлық мектеп оқушыларының 94 пайызын белсенді жазғы демалыспен қамтудың мүмкіндігі туыпты.
— Әрбір жеткіншек жазғы маусымда өз уақыттарын мейлінше тиімді өткізулері тиіс. Бұл орайда лагерьлердегі тәрбие жұмыстарының берері мол. Биылғы жылы мектеп жанындағы демалыс лагерьлерінде көптілділік мәселесін енгізуді жоспарладық. Сонымен қатар жазғы мезгілдегі балалармен жұмыс кезінде оларды қазақстандық патриотизм рухында тәрбиелеу ісіне де жете мән берілетін болады. Оның ішінде оқушыларды әскери-спорттық шараларға қатыстыру ісі көзделуде. Бұдан өзге де баланың тұлғалық қасиеттерінің дамуы үшін іс-шаралар жүргізілетін болады,- дейді өз пікірінде қалалық білім бөлімінің басшысы.
Жылдағы дәстүрге сай биыл-ғы жылы да қаламыздағы «Жас қанат» және «Жас жұлдыз» орта-лықтарында тағылымды шаралар ұйымдастырылатын болады. Мұнымен қоса Балалар мен жастардың шығармашылық сарайы мен «Отан» экологиялық лагері балаларға ар-налған биологиялық орталықпен әріптестік қатынас орнатпақ. Бұдан өзге Астана қаласының көрнекті орындарына экскурсиялық саяхат жасалады. Ал ынта білдірген оқушылар облыс орталығы Өскемен қаласындағы этноауылда серуендеп, мәдени құндылықтармен танысу мүмкіндігіне ие. Әлбетте, бұдан өзге Абайдың туған мекені Жидебайдағы қорық-мұражайға да сапарлар ұйымдастырылмақ.
Балдырғандардың ойдағыдай тыны-ғып, денсаулықтарын сауықтыруға, мектеп жанындағы лагерьлерден бөлек, қала сыртындағы лагерьлерде де іс-шаралар өткізіледі. Атап айтсақ, «Түріксібке 50 жыл», «Жас қанат», «Радуга» сынды демалыс орталықтарында уақытты тиімді өткізуге қолайлы жағдайлар жасалған. Оған берілетін бір реттік жолдама құны 22 мың теңгені құрайды. Сондай-ақ қаламыздағы 460 аз қамтылған отбасылардың балалары бюджет есебінен тегін демала алады. Бұлардан басқа облыс көлеміндегі іргелі демалыс орындарына баруға да облыстық білім департаменті ұсыныс жасауда. Мәселен, тілек білдірген балалар Алакөл, Зайсан көлдері жағалауында демалысын өткізе алады. Сонымен қатар Матросов және Таулы Үлбі экологиялық лагерьлерінде де жаз қызығын өткізуге мүмкіндік бар. Бір айта кетерлігі, бұл демалыс орындарына берілетін жолдама құны 14 мың теңгеден басталады екен.
Қуаныш ЖОЛЫМБЕТ, «Семей таңы»
