Мамыр айының 18-24 күндері аралығында Өскемен қала-сында ШҚО әкімінің жүлдесіне арналған XX Халықтық спорттық ойындардың жалауы желбіреген болатын. Ел Тәуелсіздігінің 25 жылдық мерейтойына орай ұйымдастырылған сайыста Семей қаласының құрамасы 11 алтын, 12 күміс және 8 қола жүлдені еншілеп, бейресми командалық есепте 2-ші орынға тұрақтады. Бұл туралы өткен жұма күні қалалық Ақпарат орталығында жарыс жеңімпаздары мен жүлдегерлерінің қатысуымен өткен баспасөз мәслихатында айтылды.
Әйтсе де басқосу барысында сөз алған қалалық дене шынықтыру және спорт бөлімінің жетекшісі Мұрат Құржықаев спортшыларымыздың бірқа-тар спорт түрлерінен үмітті ақтамағанын тілге тиек етіп, бұл нәтижеге көңілі толмай-тындығын ашық жеткізді.
— Биылғы Халықтық спорт-тық ойындарға бірқатар өзге-рістер енгізілді. Мәселен, ойын бағдарламасынан жорға және тай жарысы, аударыспақ, теңге алу, қыз қуу, асық ату, президенттік көпсайыс сынды жарыстар алынып тасталыпты. Оның орнына дзюдо және еркін күрес қосылды. Ат спортынан тек 15 және 25 шақырымдық аламан бәйге ғана қалдырылған. Осы жарысқа Семей қаласынан 156 адам аттанған еді. Оның ішінде шахмат, дойбы, тоғызқұмалақ, көкпар, аламан бәйге және еркін күрестен біздің саңлақтар жоғары нәтижеге қол жеткізді. Әсіресе көкпаршыларымыздың жетістігі мерейімізді асырды десек те болады. Себебі семейлік көкпаршылар Халықтық ойындардың 20 жылдық тарихында тұңғыш рет жеңімпаз атанып отыр. Алайда футбол мен қазақ күресінен сынға түскен жігіттердің өнері көңілден шықпады. Жасыратыны жоқ, ең жоғары жүлдені осы спортшылардан күткен едік. Семей — футболдың отаны екені және қазақ күресінен «Қазақстан барысы» жобасының чемпиондары біздің қаламыздан шыққаны белгілі. Бірақ аталмыш сайыстарда үкілеп апарған спортшыларымыз жеңіс тұғырынан көріне алмады. Сондай-ақ волейболдан ерлер командасы да әлсіздіктерін байқатып қалды,- деп атап өтті Мұрат Мұрсаханұлы.
Сонымен қатар облыс әкі-мінің жүлдесіне арналған до-да барысында көрсетілімдік бағдарламаға кураш, човган, биік бағанаға шығу сынды бірнеше ойындар жұртшылық назарына ұсынылып, киіз үйлер байқауы өткізіліпті. Осы байқауға түскен Семейдегі Достық үйінің татар мәдени бірлестігі ұлттық дәстүрлерінен көрме ұйымдастырып, әділ қазылар тарапынан үздік деп танылған екен.
Бұдан өзге 20-шы мәрте жалауы көтерілген Халықтық спорттық ойындардың ашылу салтанатына қатысқан Семей қаласы құрамасының киім үлгісі де жоғары бағаланыпты.
Баспасөз мәслихаты барысында дзюдодан қала құрамасын бастап барған жаттықтырушы Иван Цыкунов жерлес палуандардың сәтсіз-дігіне тоқталып, алдағы уақытта мұндай олқылықтарға жол бермеуге күш салатындарын жеткізді.
Жақсылық СҮЛЕЙМЕН, «Семей таңы»
