Семейде веложарыстан жасөспірімдер арасында қаланың ашық біріншілігі ұйымдастырылды. 1 маусым – Халықаралық балаларды қорғау күніне және ел Тәуелсіздігінің 25 жылдық мерейтойына арналған сайысқа биыл 60-қа жуық спортшы қатысуға ниет білдіріпті.
Қалалық дене шынықтыру және спорт бөлімінің ұйытқы болуымен қолға алынған аталмыш аламан Түйемойнақ аралында өткізілді. Оның мақсаты Қарағанды облысында жалауы желбірейтін «Олимпиада үміті» турнирінде Семейдің намысын қорғайтын үздік спортшыларды іріктеу әрі өскелең ұрпақты бұқаралық спортқа тарту болып табылды. Жарысқа қатысушылар жас ерекшеліктеріне байланысты 3 топқа бөлініпті. Олар топтық сайыс бойынша 15 шақырымдық кезеңде өзара кіл мықтыларды анықтады.
— Жекелей жарыстар бізде үнемі өткізіліп келеді. Ал топтық сайыстарда тәжірибеміз аз. Қарағанды облысында ұйымдастырылатын республикалық додада біздің шәкірттерімізге 5 топтық кезеңде өз күштерін дәлелдеуге тура келеді. Сондықтан бүгінгі біріншіліктің форматы өзгеше. 15 шақырым балалар үшін аса қиындық тудырмайды. Кәсіпқой велошабандоздардың өзі 200 шақырым қашықтықта өз мықтылықтарын анықтайды. Чемпионат екі күнге жалғасады. Оның нәтижесінде қала құрамасы жасақталатын болады. Айтарлықтай нәтижелеріміз жоқ болса да, қоржынымызға қомақты жүлделерді түсіретін дарынды шәкірттеріміз бар. Алдағы сындарда олардың намысты қолдан бермейтініне кәміл сенімдіміз,- дейді Семей қаласы құрамасының велоспорттан аға жаттықтырушысы Валерий Бакунькин.
Дәл сондай келешегінен зор үміт күттіретін спортшылардың бірі — Ислам Қабкенов. Жас өреннің спорттың осы түрімен айналысып жүргеніне көп уақыт өте қоймапты. Соған қарамастан, болашақта кәсіби тұрғыда айналысуды мақсат етіп отыр. Өзінің үлгі тұтатын велошабандозы да жоқ емес екен.
— Төрт айдың көлемі болды осы велоспортқа келгеніме. Өзімнің жаныма жақын. Жылдамдықты ұнатамын. Алдағы уақытта жекелей жарыста уақыт көрсеткішімді жақсартқым келеді. Биік жетістіктерім әзірге жоқ. Жетістіктерге жету үшін табжылмай жаттығып, тер төгіп еңбек ету керек. Оған мен дайынмын. Әрбір жас қазақстандық велоспортшылар Александр Винокуров сияқты Олимпиадада жеңіске жетіп, көк байрақты асқақтатуды армандайтыны рас. Мен де сол дарынды спортшы секілді елімнің мәртебесін асырғым келеді. Бұл мақсатыма жету үшін мен аянып қалмаспын,- дейді И.Қабкенов.
Жақсылық МҰРАТҚАЛИҰЛЫ, «Семей таңы»
