Таяуда Үржар ауылында, 1 маусым — Халықаралық балаларды қорғау күніне орай, бүлдіршіндердің игілігі үшін Балалар саябағында жаңа заман талабына сай түрлі түсті, әуенді субұрқақтың ашылу салтанаты өтті. Еліміздің болашағы балалардың алаңсыз өмір сүруіне, бос уақыттарын тиімді пайдалануына жағдай жасап, назардан тыс қалдырмай, ерекше көңіл аудару Елбасымыз Н.Ә.Назарбаевтың сарабдал саясатының басым бағыттары болып қала бермек.
Әдемі әуенімен бірге қозғалатын субұрқақтың ашылу салтанатында алғашқы құттықтау сөз аудан әкімі Серік Зинабекұлы Зайнулдинге берілді. Аудан тұрғындарын осынау әсем субұрқақтың ашылуымен құттықтаған аудан басшысы өз сөзінде:
— Бүгінгі күн — Үржар ауданы үшін үлкен мереке. Ауданымызда 12 400 оқушы бар. 3 800-ге тарта бүлдіршіндер мектеп жасына дейінгі тәрбие мен білім алып жатыр. 1 маусым – Халықаралық балаларды қорғау күнінде үржарлық бүлдіршіндерге үлкен тарту жасап отырмыз. Елімізде бақытты балалық шақтың алаңсыз өтуіне барлық жағдай жасауда,- деді Серік Зинабекұлы.
Аудан әкімі аудандық әкімдік және мәслихат атынан көпшілікті мерейлі де қуанышты күнмен құттықтап, дендеріне саулық, отбасыларына амандық, қажыр-қайрат тіледі. Сондай-ақ өздерінің жылы лебіздерін Үржар ауданының тұрғындары — қарт ұстаз А.Жұмаділов пен ауылдың белсенді азаматшасы С.Кебіспаева білдірді.
Салтанатты жиын барысында құны 25 млн. теңге болатын субұрқақты салып, пайдалануға берген Астана қаласының «Бота» ЖШС-нің басшысы Қ.Қожахметов пен субұрқақ құрылысының тас қалаушысы А.Жақашевқа аудан әкімінің алғыс хаты мен сый-сияпаты табыс етілді. Сонымен қатар Серік Зинабекұлы береке-бірліктері мен ұйымшылдықтарын танытқан барлық мекемелер мен мектептер ұжымдарына, құрылысшы азаматтар мен осы жұмыстардың басы-қасында жүріп, өлшеусіз үлес қосқан Үржар ауылының әкімі Сайлауғазы Шарықбаевқа алғысын жеткізді.
Осы күні аудандық орталық мешіт пен Е.Төлемісов, Қ.Қожахметов сынды азаматтар бүлдіршіндерге қуаныш сыйлады — 1500 дана балмұздақ тегін таратылып, балаларды мәз-мейрам етті.
Толқындарын аспанға атқан әуенді субұрқақтың іске қосылуы ауыл тұрғындарына, әсіресе балаларға ерекше әсер етті. Айта кету керек, судың екпіні 15 метр биіктікке көтеріліп, әртүрлі түске еніп өзгеріп отырады. Осылайша, Балалар күні мерекесінде Үржар аспаны ән мен биге бөленді.
Бауыржан ЖАҚЫП, «Семей таңы»
