Алдағы дүйсенбі, маусымның 6-cы — қасиетті Рамазан айының алғашқы күні. Күллі мұсылман әлемі даярлық жасап жатқан, сансыз сауаптарға толы ай қарсаңында семейлік дін қызметкерлері де әзірлік жүргізуде. Тек осы айда ғана орындалатын асыл дініміздегі бес парыздың бірі Ораза ғибадаты жайлы жұртшылыққа түсінік беру мақсатында қаламыздағы Ақпарат орталығында ҚМДБ-ның Семей өңірі бойынша өкілдігі баспасөз мәслихатын өткізді.
БАҚ өкілдері алдында сөз алған ҚМДБ–ның Семей өңірі бойынша өкіл имамы Мақсат қажы Алтыбай биылғы оразаның басталу мерзімі, сәресі мен ауызашардың сауаптылығы және әрбір жан басына берілетін пітір садақасының көлемі жайында мағлұмат беріп өтті.
Биылғы ораза маусымның 5-і күні кешкі мезгілде кіреді. Яғни осы күні қаламыздағы барлық мешіттерде құптан намазынан соң тарауих оқылады. Жұртшылыққа уағыз-насихат айтылатын болады. Ал Рамазан айы 29 күнге ғана созылмақ. Сонымен қоса халқымыз үшін дәстүрлі саналатын Ханафи мәзхабы бойынша уәжіп (орындалуы міндетті) амал пітір садақасы айт намазына дейін берілуі тиіс. Биыл оның көлемі Қазақстанның барлық аймақтары бойынша 200 теңге болып бекітіліпті. Алайда жоқ-жітік, кембағал жандарға бидай, арпа, құрма немесе мейіз түрінде де беруге болады.
Сонымен қатар ҚМДБ-ның Семей өңірі бойынша өкіл имамы кешкілік оқылатын тарауих намаздарына да тоқталды. Атап айтсақ, қос мұнаралы Орталық мешітте және Шығыс кентіндегі жаңадан салынған Шәкәрім қажы атындағы мешітте түрік елінен келетін қарилар Құранды хатым ететінін (ораза бойы толық оқып шығатынын) де жеткізе кетті. Қазіргі күні Түркияның Діни істер министрлігі мен Мүфтият арасында келісім жүргізілуде.
Сондай-ақ Мақсат қажы Алтыбай Рамазан айындағы парыз болған оразаның сауаптылығы және осынау ғибадаттың шарттары, орындалу тәртібі мен оны бұзатын жайттар туралы да мағлұмат беріп өтті.
— Рамазан айында жасаған әрбір жақсылық, ізгі амал 70 есеге дейін көбейеді. Сол себепті оның сауабынан құр қалмау керек. Мұнымен қатар Алла қастерлі еткен осынау айға құрметпен қарап, той-томалақты кейінге қалдырып, қатым-ас дастарқанын кешкілік ауызашар мерзімде ғана жайған абзал,- деді өз сөзінде шаһарымыздың бас имамы.
Мақсат қажы сонымен қоса биыл алғаш рет ауыз бекітуге бекінген жандарды ішкі қорқынышын жеңуге шақырды. Ол үшін ниетті нықтап, дін қызметкерлерінің кеңесіне жүгініп, діни насихат тыңдап, күнәлі істерден аулақ болып, рухани шыңдалуға ден қойған жөн. Жылына бір-ақ рет келетін сауабы орасан зор ғибадаттан ғапыл қалмауға үндеді.
— Ата-бабаларымыз «Ораза намаз тоқтықта» деп бекерге айтпаған. Қазіргі таңда байтақ еліміздегі саяси тұрақтылық, келісім мен бірлік – Алланың берген үлкен нығметі. Ендеше, осыған шүкіршілігімізді білдіріп, ораза тұтайық! Алла бұйырғандай құлшылық жасап, еліміз үшін, өзіміз үшін дұғада болайық. Бұл ай — тілектер қабыл болатын ай! — деді өкіл имам.
Сондай-ақ өкіл имам осынау айдағы жасалатын қайырымдылық шараларына да тоқталып өтіп, журналистер тарапынан қойылған бірқатар сауалдарға жауап қайырды.
Қуаныш ЖОЛЫМБЕТ, «Семей таңы»
