Апта басында Қаратұма мектеп-бақшасында «Жасыл ел» бағдарламасын жандандыру және мектеп ауласын көгалдандыру мен көріктендіру арқылы жас ұрпақты еңбексүйгіштікке, ұжымшылдыққа, береке-бірлікке тәрбиелеу мақсатында аудандық әдістемелік семинар өтті. Жиынға Үржар ауданының әкімі С.Зайнулдин, аудандық мәслихат хатшысы Қ.Қарашев, білім, дене шынықтыру және спорт бөлімінің басшысы С.Жүнісова, аудандық «Нұр Отан» партиясы филиалы төрағасының бірінші орынбасары Б.Баймұратов, аудандық қоғамдық кеңес төрағасы М.Бітімбаев, Қаратұма ауылының әкімі М.Батырбаев, аудандағы барлық мектеп директорлары мен шаруашылық ісі жөніндегі меңгерушілер қатысты.
Шара мектеп ауласындағы көгалдандыру ісімен танысудан басталды. Мұндағы мектеп мұғалімдері мен оқушылар бірлесе отырып жасаған әртүрлі аңдар мен құстардың бейнесі, қажетсіз қатты қалдықтардан жасалған ертегі кейіпкерлері, жылыжай, ботаникалық бақ, гүлзарлар аудан ұстаздарын таңғалдырып, өзге әлемге енгендей әсер етті.
Жоспарға сай, аудандық білім, дене шынықтыру және спорт бөлімінің басшысы Сәуле Жүнісова аудан басшысы тарапынан берілген мектептің айналасындағы тазалықты сақтау және абаттандыру, көгалдандыру жөніндегі тапсырмалардың орындалу барысы туралы хабарлама жасады. Осы орайда Қаратұма мектеп – бақшасындағы жұмыстардың барлығы ешқандай шығынсыз, тек табиғи материалдардан жасалғанын айта кетті Сәуле Орынбайқызы.
Қаратұма орта мектебінің директоры Мұратбек Жанабеков «Бірлік бар жерде, тірлік бар» дегендей, бүгінгі сіздер куә болып отырған жұмыстар — мектебіміздің мұғалімдері мен оқушыларының және ата-аналардың еңбегінің нәтижесі екенін атап өтіп, алдағы уақытта да білім мен еңбекте алда болуға бар күшімізді салатынын жеткізді.
Семинар жұмысының қорыты-ндысында сөз алған аудан әкімі Серік Зинабекұлы Зайнулдин өз пікірін білдіріп өтті.
— Бұл — мектеп пен ата-аналар арасындағы өзара ынтымақты байланыстан туындаған игілікті жұмыстар. Алдағы уақытта осындай абаттандыру шараларын жақсы жүргізген мектеп басшылары, биология пәні мұғалімдері, шаруашылық ісі жөніндегі меңгерушілердің еңбек-тері бағалануы керек. Осы ретте мектепке деген көзқарасты өзгертіп, бүгінгі семинардан қорытынды шығарайық. Ауда-нымыздың барлық мектептері осындай болуға тиіс. Сонда оқушыларымыздың да білімге деген ынталары жоғары болады деп ойлаймын,- деген аудан басшысы Қаратұма ауылының әкімі Марат Батырбаевқа, мектеп директоры Мұратбек Жанабековке және мұғалімдер ұжымына осынау еңбектері үшін алғыс айтты.
Бауыржан ЖАҚЫП, «Семей таңы»
