Жарма ауданы жер қойнауындағы кен байлығымен мәшһүр. Қызылсу мен Шар өзенін бойлап жатқан Қалба сілемі жергілікті халықтың ырыздығына біткен. Бүгінгі таңда тұнып жатқан құндылықты игілікке жаратуға басымдық берілуде. Тек үстіміздегі жылдың өзінде өңірге ірі кен игеруші кәсіпорындар бет бұрып, еліміздің Үдемелі индустриялық-инновациялық бағдарламасына енуге ынта білдірушілер қатары артып келеді. Солардың бірі «ГМК Васильевское» ЖШС алтынның негізгі отаны болған Ақжал ауылдық округіне қарасты «Васильевское» кен орнын игеруге ұсыныс жасап, таяуда бұл жоба аудандық үйлестіру кеңесінде талқыланып, кеңес мүшелерімен бір ауыздан мақұлданды.
Ертеден алтын игерілген Бөке елдімекенінің бүгінде жұрнағы ғана қалған. Мұнда тек бірер түтін ғана бар. Ендігі аралықта бұл жағдай өзгеруі мүмкін. «ГМК Васильевское» ЖШС-нің техникалық директоры Валерий Брюлиннің мәліметіне сүйенсек, кәсіпорынның бұл кен орнына көңіл бөлуіне, ең алдымен, тас жол мен темір жолдың және электр желісінің жақын орналасуы себеп болған екен. Екіншіден, өткен ғасырдан танымал кен орны сол уақыттан бастап зерттеліп, жер қойнауының байлығы нақты бағамдалған. Кәсіпорын құрамында алтыны бар кенді игеріп, өңдеп, алтын құймаларын құюды көздейді. Мамандар сараптамаларына сүйенер болсақ, кен орнында шамамен 17,5 тонна қор бар.
Жұмыс жоспарына сәйкес, ең алдымен кенді шаймалап, сілтісіздендіретін қондырғы құрылысы жүзеге асырылмақ. Осылайша, 2017 жылы бұл нысан қолданысқа берілмек. Ал екінші кезеңде кенді өңдеу фабрикасы салынатын болады. Бұл нысан 2020 жылы толық өз жұмысына кіріседі. Жоспардың бірінші кезеңінде шамамен 150-200 тұрақты жұмыс орны ашылса, жұмыстың екінші кезеңінде жұмысшылар саны 500-ге дейін жетпек. Бұл Бөке ауылына үлкен серпін болмақ. Қаңтарылған кен орнына қайла қайта тиіп, кеншілер ауылының түтіні түзу шығатын күн алыс емес секілді. Олай дейтініміз — кәсіпорынның жұмыстары жүйеге келтірілісімен, бірқатар келелі істер де жүзеге аспақ. Яғни негізгі жұмысшылар вахталық әдіспен жұмыс істейтіндіктен, арнайы ғимарат тұрғызылмақ.
Дегенмен кен аумағын зерттеу жұмыстары әлі де кешенді түрде жүріп жатыр. Барлық құрылыс кәсіпорынның өз қаражатына салынатын болады. Ал жоба құны 2,5 млрд. теңге.
Жұмыс жүйеге келіп, алғашқы жемісін берсе, Бөкенің берекесі артатыны сөзсіз. Аудан басшысы Нұрлан Сыдықов тау-кен саласының маманы ретінде өңірлік өндірістің өрісін арттыруға баса ден қоюда. Бастамалы іс қазіргі күннің өзінде жемісін беруде. Осылайша, Бөкенің екінші тынысы ашылмақ.
Мейірхан ОСПАНБАЕВ, «Семей таңы»
