Өткен сенбі, 4 маусым күні қала әкімі Ермак Сәлімов Комсомол кентінде болып, инфрақұрылым жүргізу мен абаттандыру шараларының барысына қанықты.
Естеріңізге сала кетсек, ағымдағы жылдың 14 мамыры күні қала әкімі кент тұрғындарымен кездесіп, кездесу қорытындысы бойынша коммуналдық мекемелер мен әкімдіктің бөлім басшыларына бірқатар тапсырмалар берген болатын. Атап айтсақ, бүгінгі күні ТҮКШ бөлімі жобалық құны 148,4 млн.теңге болатын ШҚО Семей қаласы Комсомол кентінің Дружба, Достық, Жидебай, Ермек, Шөптіқақ көшелеріндегі тұрғын үйлерге электр қуатын беретін желілердің құрылысы бойынша жобалық-сметалық құжаттама әзірлеген екен. Аталған жоба бойынша арнайы жүргізілген мемлекеттік сараптама бар. Жоба бюджеттен қаржыландыруды қажет етеді.
Сондай-ақ жоғарыда аталған көшелерден қоқыс шығару мәселесі «Медведев» жеке кәсіпкерлігінің күш салуымен шешімін тауып, қатты тұрмыстық қалдықтарды тасып шығару жөнінде шарт жасасу қажеттігі туралы түсіндірме жұмыстары жүргізілді.
Сумен жабдықтауға қатысты «Семей Водоканал» МКК кенттің ЕТЖЖ-не сәйкес және Достық көшесінен Саржал көшесіне дейінгі тұрғын үйлердің сумен қамтылуын ескере отырып, ЖСҚ әзірлеу үшін қалалық құрылыс бөлімі техникалық шарттар ұсынған болатын. Су құбырын өз күшімен орнатуға 11 үй өтініш білдіріп, бүгінгі таңда техникалық шарттарын қолдарына алды.
Сонымен қатар аумақтағы қаңғыбас иттерді аулауға қатысты да біршама жұмыстар атқарылды. Осынау аралықта аталмыш кенттен 58 иесіз ит ауланды. Жалпы, жыл басынан бері Комсомол кентінде 97 қаңғыбас ит мен мысықтар ауланып, жойылды. Аталған бағыттағы жұмыс жалғасуда және жергілікті билік тарапынан бақылауда тұр.
Бір бұл емес, қазіргі күні қалалық әкімдіктің Жолаушылар көлігі және автомобиль жолдары бөлімі кент жолдарын грейдерлеу жұмысын бастады. Бүгінгі күні Дружба, Достық, Жидебай, Ермек, Шөптіқақ, Бөкейханов және Краснодонская көшелері бойынша жоспарланып отыр. Түйіндей айтсақ, проблемалық мәселелер алдағы уақытта да қала әкімінің жеке бақылауына алынып, жоспарлы түрде шешілетін болады.
Семей қаласы әкімінің баспасөз қызметі.
