Өткен айда Семей қаласының әкімі Ермак Сәлімов қаланың Жаңасемей және бас темір жол вокзалы аралығындағы шойын жол аумағымен арнайы жүріп аталмыш учаскелердің санитарлық тазалығын қадағалаған еді. Рейд нәтижесінде шаһар басшысы бірқатар дербес бөлім жетекшілері мен жауапты мекеме өкілдеріне сын-ескертпелерін жеткізіп, оны түзетуге нақты тапсырма жүктеген-ді. Осыған байланысты қалалық әкімдікте Ермак Бидахметұлының төрағалығымен арнайы жұмыс тобының қорытынды отырысы өтті.
Ең алдымен қала басшысы қалалық ТҮКШ және жолаушылар көлігі және автомобиль жолдары бөлімдерінің жетекшілерінен Народный көшесіндегі құрылысы кенжелеп қалған жаңа мешіт маңайындағы санитарлық тазалықтың мән-жайын сұрады.
— Бұл аумақтың Жаңақұрылыс ауданына жақын бөлігін біздің қызметкерлер тазалап шықты. Барлық тұрмыстық және құры-лыстан қалған заттар, сондай-ақ өзге де қоқыстар толығымен шығарылды. Ал осы айналма жолдың екінші бөлігін «Возрождение» қоғамдық бірлестігімен бірге ретке келтіруді көздеп отырмыз. Бұл жерде қысқы маусымда бізге қажетті инертті материалдар бар. Оны «Возрождение» ҚБ-нің рұқсатын ала отырып, сол жерде қалдыруды жөн санадық. Керек кезде инертті заттарды сол маңнан таситын боламыз,- деп атап өтті Семей қаласы жолаушыларды тасымалдау және автокөлік жолдары бөлімінің басшысы М.Әленов.
Алайда жауапты ведомство басшысының сөзі қала әкімінің көңіліне медеу бола алған жоқ. Бұл ретте Ермак Сәлімов осы бағытта жүйелі әрі жоспарлы жұмыстың жоқтығын алға тартты.
— Сіздерді осы мәселеге немқұрайлы қарамауға шақы-рамын. Бір-екі рет сенбі-лік ұйымдастыруға болады ғой. Бұл жерде ұйымдастыру жұмыстарының аздығы байқалып отыр. Ұрандатып уәде бергенге барлығы мықты. Ал нақты іске келгенде, кімнің-кім екені белгілі болып жатады. Сондықтан да сіздерге екі күндей уақыт беремін. Осы мәселені біржола шешіңіздер,- деді Ермак Бидахметұлы.
Сондай-ақ шаһар басшысы қаланың сол жақ жағалауындағы жаңа көпірдің айналма жолын абаттандыру жұмыстары дұрыс жолға қойылмағанын да ашық айтты. Келесі кезекте темір жол айналасынан өтетін жер асты жылу трассасы маңын тазарту бойынша атқарылған шаруаларды «Жылукоммунэнерго» МКК-ның техникалық директоры Николай Ушаков баяндап берді.
— Сіздің тапсырмаңызға сәйкес, әр сенбі сайын аталмыш аумақта тазарту жұмыстарын атқарып келеміз. Оған үш бірлік техника тартылып отыр. Сол маңдағы күл-қоқысты түгелін қалдырмай жинауды қолға алдық. Жұмыс кестеге сай жүргізілуде,- деді өз сөзінде Николай Николаевич.
Жиында қалалық кәсіпкерлік бөлімінің жетекшісі Марат Нүгеров «Ақшың», «Жансая» және көтерме сауда орындарының әкімшілігі өз аймақтарының санитарлық жағдайын тиісті қалыпқа келтіргенін жеткізді.
Жақсылық МҰРАТҚАЛИҰЛЫ, «Семей таңы»
