Қазіргі Қазақстан экономикасын дамытудағы маңызды бағыттардың бірі — жеңіл өнеркәсіп. Қазақстан Республикасында ҚР-ның жеңіл өнеркәсіпті дамыту жөніндегі 2010 — 2014 жылдарға арналған бағдарламасы аясында аталмыш саланы дамыту қолға алынған еді. Бұл бағдарлама шалғайда жатқан ауылдарда, шағын және ірі қалаларда жеңіл өнеркәсіптің дамуына септігін тигізсе, осы күні аяғына тұра бастаған кәсіпорындар, жеке кәсіпкерлер үшін үлкен демеу болды. Жеңіл өнеркәсіп Қазақстан экономикасының инновациялық секторларының бірі екендігі ерекше аталып, бұл саланы дамытуға, отандық өнім өндірушілерді қолдауға және тауардың бәсекеге қабілетті әрі сапалы болуына үнемі көңіл аударылуда.
Уақытында ұсынылған бағдарламаның нәтижесін еліміздегі дүкен сөрелерінде «Қазақстанда жасалған» белгісі бар тауарлардың көбейе бастағанынан аңғаруға болады. Жалпы, Семей қаласында шағын және орта бизнестің дамуы қарқынды. Әлбетте, бұл ретте жеңіл өнеркәсіптің алар өзіндік орны бар. Әсіресе арнайы киімдер тігетін цехтардың жұмысы жақсы жолға қойылған. Осындай кәсіпорындардың бірі ретінде Ертіс өзенінің сол жағалауында орналасқан «Баязит» тігін фабрикасын айтуға болады. Кәсіпорын өз жұмысын 2011 жылы ғана бастаса да, бүгінгі таңда жүзге жуық маман жұмыспен қамтылған. Мұнда жоғары дәрежелі дизайнерлер мен модельерлер тұтынушылармен тығыз байланыс жасап, арнайы кәсіби киім үлгілерін ұсынады. Киім үлгілерін тігуде заманауи инновациялық технология әдістерімен дайындалған сапалы маталар қолданылады. Энергетиктерге, ағаш шеберлеріне, мұнайшылар мен дәнекерлеушілерге арналған кәсіптік киімдер бар. Жеңіл өнеркәсіп нысаны Шығыс Қазақстан өңірі бойынша «Қазақтелеком» АҚ, «Локомотив» АҚ, «Қазақстан темір жолы» АҚ, «Қарағанды Су» ЖШС, «Маңғыстау Мұнай Газ» АҚ, «Соколов-Сарыбай тау-кен байыту өндірістік бірлестігі» АҚ сынды ірі кәсіпорындар мен корпорациялардың тапсырысын орындап келеді. Кәсіпорында заман талабына сай құрылғылар орналасқан. Фабрика киім пішу, тігін машиналары, әрлеу, кесу құрылғыларымен қамтамасыз етілген.
— Жеңіл өнеркәсіп деп аталғанымен, бұл өндірісті дамыту үшін үлкен талап, қажырлы еңбек қажет. Жеңіл өнеркәсіп орнын құру, дамыту үшін қолданылатын материалдар, маталар, машиналар, технологиялар үнемі жаңартып отыруды талап етеді. Тек сол жағдайда ғана сапалы өнім алуға болады. Осы орайда жұмысы қиын әрі жауапты жеңіл өнеркәсіп қызметкерлерін кәсіби мерекелерімен құттықтап, еңбекте жетістіктерге жете берулеріне тілектестігімді білдіремін,- дейді кәсіпорын жетекшісі Дианар Тұрсұнханова.
Ажар ЖАНБОЛАТ, жас конструктор-модельер.
