Семей қаласында Ұлттық бірыңғай тестілеудің (ҰБТ) қорытындысы шығарылды. Ағымдағы жылы ҰБТ шаһарымызда екі пунктте, атап айтқанда Семей қаласының Шәкәрім атындағы мемлекеттік университеті мен Қазақ инновациялық гуманитарлық – заң университетінде өткен болатын. Биыл Семей өңірі бойынша ҰБТ- ға 900-ден аса жас түлек қатысуға ниет білдірген. Нәтижесінде шаһар бойынша орташа көрсеткіш 82, 9 балды құрап отыр. Бұл туралы апта сәрсенбісінде қалалық білім бөлімінің басшысы Наталья Фесенко ҰБТ қорытындысына арналған баспасөз мәслихатында мәлім етті.
Семей қалалық білім бөлімінің ақпаратына сәйкес, биылғы жылы қала мектептерін 1500-ден астам оқушы бітіріп отыр. Жоғарыда атап өткендей, аталған мың жарымға жуық түлектің тоғыз жүзден астамы ҰБТ – да бағын сынауға шешім қабылдаса, қалғандары мектепте дәстүрлі емтихан тапсыруды дұрыс деп шешкен екен.
— ШҚО бойынша орташа көрсеткіш 82 пайызды құрап отыр. Біздің мәліметімізге сәйкес, қазіргі уақытта аймақ рейтінгісінде Семей қаласы шамамен жетінші орында тұр. Жағымды жаңалықтарымыз да бар. Қаладағы №17 мектептің түлегі Кәмшат Болатқызы мүмкін болған 125 балға қол жеткізді. Бұл алғаш рет тіркеліп отыр. Осылайша, ол үздік аттестатқа лайық екендігін толық дәлелдеді. Бұдан бөлек 200-ге тарта мектеп бітіруші 100-ден аса балл жинаған. Дегенмен де шекті деңгейге жете алмаған түлектер де бар. Олардың жалпы саны 149-ды құрайды. Бұл түлектердің сынақты қайта тапсыру мүмкіндігі бар екендігін естен шығармағаны абзал,- дейді қаланың бас мұғалімі Наталья Анатольевна.
Бұдан өзге баспасөз мәслихатында қалалық білім бөлімінің басшысы биылғы жылы «Алтын белгіге» үміткер 36 түлектің тек 26-сы ғана қорғап шыққаннын атап өтті. Ал үздік аттестатқа ие болуға талпынған 15 түлектің ішінен тек 6-уы ғана аталмыш аттестатқа лайықты деп танылыпты. Білім бөлімі басшысының айтуынша, жалпы, өткен жылғы сынақпен салыстырғанда ағымдағы тестілеу сынағы қалыпты деңгейде өткізілген.
— Ұялы телефондарымен кіруге ниеттенген түлектер болды. Бірақ көп емес. ҰБТ барысын бақылаған комиссия өкілдерінің жұмысына ешнәрсе кедергі келтірген жоқ. Заңға қайшы фактілер тіркелмеді,- деп нақтылады Н.Фесенко.
Сонымен қатар қалалық білім бөлімі басшысының орынбасары Н.Тегай ҰБТ-ға қатысушылардың басым көпшілігі орыс тілі және Қазақстан тарихы сынды пәндерден жақсы білім деңгейін көрсеткенін тілге тиек етті. Дей тұрғанмен де физика және математика пәндерінен биылғы мектеп бітірушілердің көрсеткіші көңілге кірбің ұялататыны да айтылды.
Айта кету керек, Семей қаласы бойынша онға тарта жас түлек республикалық әрі халықаралық пән олимпиадаларының жеңімпаздары болғандықтан, ҚР Білім және ғылым министрінің қаулысына сәйкес ҰБТ босатылыпты.
Жақсылық МҰРАТҚАЛИҰЛЫ, «Семей таңы»
