Семей қаласы әкімінің жаңа орынбасары тағайындалды. Бұл лауазымды міндетті ендігі аралықта Николай Николаевич Ушаков атқаратын болады. Қалалық әкімдіктің кіші залында өткен жиын барысында шаһар басшысы Ермак Сәлімов орынбасарын көпшілік алдында таныстырып өтті.
Жиында кіріспе сөз алған Ермак Бидахметұлы Николай Ушаковтың өмірбаянына қысқаша тоқталып өтті. Айта кетейік, Николай Николаевичтің есімі семейліктерге жақсы таныс. Себебі осыған дейін «Теплокоммунэнерго» КММ-нің техникалық директоры болып қызмет атқарды. Семей қаласының тумасы алғашқы еңбек жолын шаһарымызда қарапайым жұмысшы болып бастаған екен. Осыған дейін ЖЭО-1, 2 мекемелерінде қазандық машинисінің көмекшісінен бастап жылу көздерінің басшысына дейінгі аралықта түрлі қызметтер атқарып, жетістікті еңбегімен танылды.
— Николай Николаевичті, бәлкім, сіздерге таныстырып жатудың өзі артық болар. Өз жерлесіміз, еңбек жолын осы қалада жалғастырып келеді. Екі жоғары білім алған. Көлік және жылу энергетика бойынша біліктілігі бар. Қаламыздағы жылу беру саласында 22 жыл еңбек өтілі бар, өз қызметінде абыроймен танылған, кәсіби тұрғыдан толысқан, тәжірибелі маман. Ендігі аралықта Николай Ушаковқа қаламызды өркендетуде бірқатар жауапты міндеттер тапсырылады. Себебі жаңа орынбасар ретінде шаһардағы тұрғын үй — коммуналдық шаруашылық, жолаушылар көлігі, автомобиль жолдары, құрылыс, сәулет мәселелерін құзырына алады. Николай Николаевичтің еңбегіне табыс тілейміз,- деді өз сөзінде қала басшысы.
Ермак Бидахметұлы сонымен қатар алдағы уақыттарда әсіресе қаламыздағы ТҮКШ және жылу беру саласында іргелі істер күтіп тұрғанын жеткізді. Атап айтсақ, мемлекеттік «Нұрлы жол» бағдарламасын тиімді түрде іске асыру, Қарағайлы ықшам ауданындағы құрылыстарды жүргізу, қала көшелерін абаттандыру, көгалдандыру сынды жауапты міндеттер тұр. Бұл ретте Николай Николаевичке аталмыш бағыттағы жұмыстардың жаңа тынысы ашылады деп үміт артылуда. Бұл жайында жиын барысында құттықтау лебіз білдірген коммуналдық қызмет саласы өкілдері де айтып өтті.
Сонымен қатар таныстырылым соңында Николай Николаевич те сөз алып, өзіне сенім білдірген облыс әкімі Даниал Ахметовке, қала әкімі Ермак Сәлімовке ризашылығын жеткізіп, артылған үмітті ақтауға уәде берді.
Қуаныш ЖОЛЫМБЕТ, «Семей таңы»
