Семей қаласының әкімі Ермак Сәлімов шаһардың шеткі аудандары тұрғындарымен кездесуді жалғастыруда. 11 маусым, сенбі күні қала әкімі көпшілік арасында заезд Шульбинский аталып кеткен көшенің және Суықбастау кентінің тұрғындарымен жүз-десті.
Семей қаласын дамытудың 2011-2015 жылдарға арналған бағдарламасына сәйкес, 2014 жылы заезд Шульбинский көшесіндегі жеке құрылыс нысандарына электр қуатын тартуға арнайы жобалық-сметалық құжаттама әзірленіп, оған мемлекеттік сараптама оң нәтижесін берген еді. Жобаның жалпы құны 37, 2 млн. теңге. Алайда қаражаттың тапшылығынан бұл жұмыс кешеуілдеп қалған болатын. Осы мәселеге қатты алаңдаған көше тұрғындары қалалық әкімдікке бірнеше мәрте барып, түйткілді проблеманы шешіп беруін өтінген-ді. Нәтижесінде, тұрғындардың тілегі ескерусіз қалмай, қала бюджетін нақтылау барысында электрмен жабдықтау желілерінің құрылысына арнайы қаржы бөлінді. Ал мамыр айында құрылыс жұмыстарымен айналысатын мердігерлерді анықтау мақсатында электронды конкурс жарияланған екен. Бұл жағымды хабарды естіген аталмыш көшенің тұрғындары қала басшысына өз алғыстарын жеткізді.
— Құрметті Ермак Бидахметұлы! Мәселеміздің оң шешілуіне ықпал еткеніңіз үшін тұрғындар атынан ризашылығымды білдіремін. Жарық көзі тартылғаннан соң, бұл жердегі тіршілік жандана түсетіні анық. Сондықтан сіздерге алғысымыз шексіз,- дейді заезд Шульбинский көшесінің тұрғыны Құсайын Жантеміров ақсақал.
Өз кезегінде Ермак Бидахметұлы құрылыс жұмыстары жуық арада басталатынын тілге тиек етіп, тұрғындардың көше тазалығына мән беруі керектігіне тоқталды.
— Конкурс аяқталды. Тиісті жұмыстар жақын күндері басталмақ. Негізі, мердігер мекеме, заң бойынша, желіні тарту жұмыстарына маусым айының соңында кірісуі тиіс болатын. Алайда олар ертерек бастауды жөн санап отыр. Енді сіздерден аудандарыңыздың санитарлық тазалығы мен оны абаттандыру мәселелеріне дұрыстап көңіл бөлулеріңізді сұраймын,- деді шаһар басшысы.
Бұл ретте заезд Шульбинский көшесінің тұрғындары аумақтың санитарлық жағдайын ретке келтіруде қалалық мәслихат депутаттарының қолдауы зор екенін атап өтті. Әсіресе Марлен Көкірекбаев, Марат Сандыбаев және өзге де халық қалаулыларының бұл мәселені шешуде қол ұшын созғандарына алғыстарын айтуда. Ендігі кезекте тұрғындар тұрмыстық зат және өзге де қоқыстарды шығарумен шұғылданатын мекемелермен келісімшартқа отыруды жоспарлауда. Сонымен қатар жақын маңда бірде-бір дәріхананың жоқтығы да айтылды. Бұл да өз кезегінде жергілікті тұрғындарға ауыртпашылық тигізуде. Дегенмен де тұрғындар осы арадан дәріхана тұрғызуға ниетті жандар бар екенін қала әкіміне жеткізді. Тек атқарушы билікпен ақылдаса отыра құрылыс тәртібін ретке келтіру ғана қалыпты. Ол үшін Ермак Сәлімов әлеуметтік нысанды салуды жоспарлап отырған азаматтардан қалалық әкімдікке келіп хабарласуларын сұрады. Келесі кезекте Ермак Бидахметұлы Суықбастау кентіндегі Цветочная көшесінің тұрғындарымен жүздесті. Белгілі болғандай, мұндағы басты мәселе — тозығы жеткен кәріз жүйелері. Дей тұрғанмен де қала басшысы аталмыш проблеманы шешудің жолдары барын атап өтті.
— Бүгінгі таңдағы негізгі міндет кәріз жүйелерін лас судан тазарту болып отыр. Әзірге оны арнайы техниканың көмегімен жүзеге асыратын боламыз. Бұл жұмыстарды Рафаэль Хазипов басқаратын мекеме қолға алып отыр. Ал келешекте жобалық-сметалық құжаттама негізінде осы ауданның кәріз жүйесі қаланың ортақ кәріз желісіне тартылатын болады,- деп нақтылады Ермак Бидахметұлы.
Жақсылық МҰРАТҚАЛИҰЛЫ, «Семей таңы»
