Ел Тәуелсіздігінің 25 жылдығы мен Л.Гумелев атындағы Еуразия ұлттық университетінің 20 жылдығына орай ұйымдастырылған «Алтай мұрасы» автоэкспедициясы Семейге жетті. Астанадан бастау алған жорық Қазақстанның бірқатар облыстары мен Ресейдің Алтай өңірі арқылы 4500 шақырым жолды жүріп өтеді.
Жалпы, «Алтай мұрасы» керуені белгілі қоғам қайраткері, жерлесіміз Ерлан Сыдықовтың басшылығымен жүзеге асуда. Зиялы қауым өкілдері, этнографтар, тарихшылар мен ақын, жазушылардан тұратын экспедиция тарихи орындарды, ескерткіштер мен мұражайларды аралап, халықпен кездесулер өткізеді. Семей қаласына келген топ Шәкәрім атындағы университетке ат басын бұрып, ақын ескерткішіне гүл шоқтарын қойды. «Алтай мұрасы» автоэкспедициясының басты мақсаты — еліміздің Тәуелсіздік жылдары жеткен жетістігін жұртқа жария ету. Оған қоса ғылыми бағыт ұстанған жорық ел арасынан фольклор, тарихи деректер жинақтап, археологиялық қазба жүріп жатқан жерлерді де аралайды. Семей қаласының Шәкәрім атындағы мемлекеттік университетінде өткен кездесуде университет ректоры Мейір Ескендіров оқу ордасының жеткен жетістіктері туралы мақтанышпен айта келіп, келген қонақтардың бұл сапары туралы университет тарихында алтын әріптермен жазылатынын жеткізді. Ерлан Сыдықов «Алтай мұрасы» экспедициясының негізгі мақсатымен таныстырып, Еуразия ұлттық университетінің 20 жылдық мерейтойы қарсаңындағы бұл шараның мәні зор екенін атап өтті. Сонымен қатар Елтаңба авторы Жандарбек Мәлібеков өз қолымен жасалған Елтаңбаны университетке салтанатты түрде табыс етті. Экспозиция мүшелері университеттің профессорлық – оқытушылық құрамымен кездесу өткізді. Мұнда университет ұстаздары тарапынан Ерлан Бәтташұлына көкейтесті сұрақтар қойылды. Осы кездесуде қоғам қайраткері Ерлан Бәтташұлына «Семей қаласының Шәкәрім атындағы мемлекеттік университетінің Құрметті профессоры» атағы берілді. Жалпы, Ерлан Сыдықовтың есімі, елімізбен қатар, алыс – жақын шетелдерге де танымал. Лев Гумилев атындағы Еуразия ұлттық университетінің ректоры Ерлан Бәтташұлы халықаралық педагогикалық білім беру ғылымдары академиясының академигі, 400-дей ғылым және ғылыми көпшілік еңбектің, соның ішінде Англияда, Қазақстанда, Ресейде, Түркияда басылған монографиялық еңбектердің, сөздіктер мен энциклопедиялардың авторы болып табылады. Алаштану және шәкәрімтану ғылыми бағыттарының негізін қалаушылардың бірі.
Айнұр ТАҢЖАРЫҚҚЫЗЫ, Семей қаласының Шәкәрім атындағы мемлекеттік университетінің студенті.
