Семей қаласының әкімі Ермак Сәлімов шаһардағы Перинаталды орталығының анестезиология және реаниматология бөлімінің меңгерушісі Сергей Асташкинге «Ақшың» тұрғын үй кешенінен екі бөлмелі пәтер кілтін Медицина қызметкерлерінің күні қарсаңында табыс етті.
Сергей Асташкин өңіріміздің денсаулық сақтау саласында анестезиолог болып қызмет жасағанына жиырма жылдан асқан. Бүгінде жоғары санатты маман өңірімізде білікті дәрігер ретінде танымал. «Сергей Александрович өз ісінің қыр-сырын жетік білетін, қиын сәттерде жылдам шешім қабылдай алатын білімімен және біліктілігімен танылған адам. Ол сондай-ақ науқастарға асқан жауапкершілікпен қарайтындығымен ерекшеленеді»,- дейді әріптестері.
Сергей Асташкин осы жылдар бойы пәтер жалдап тұрып келді, енді өзге өңірге көшуді ойлаған екен. Білікті, жоғары санатты маманды қаламызда қалдыру үшін қалалық әкімдік барлық мүмкіндікті қарастырып, оның басты мәселесі болған баспанамен қамтамасыз етіп отыр. «Ақшың» корпорациясы салған жаңа көп қабатты үйден екі бөлмелі пәтер кілтін табыстау барысында қала әкімі білікті дәрігерді құттықтап, алдағы жұмысына сәттілік тіледі. «Бұл кәсіби мерекелеріңіздің қарсаңындағы ерекше оқиға болды. Алдағы уақытта жұмыстарыңызға тек сәттілік тілеймін»,- деді Е.Сәлімов. Семей қаласы әкімінің баспасөз қызметінің мәліметінше, 2015 жылы қала көлемінде 267 адам өз тұрғын үй мәселесін шешкен, ал жыл басынан бері 126 отбасы жаңа пәтерге ие болыпты. Жыл соңына дейін қалада 11 көп пәтерлі тұрғын үй пайдалануға беріледі деп жоспарлануда.
Асан МЫРЗАХАН, «Семей таңы»
