Ағымдағы жылдың 15-ші тамызынан бастап электр жарығының бағасы қымбаттауы мүмкін. Бұл жайында сәрсенбі күні Семей қаласы әкімдігінің үлкен залында өткен қоғамдық тыңдауда айтылды. Қазақстан Республикасы Ұлттық экономика министрлігі Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаменті басшысының міндетін атқарушы Наталья Петрованың жетекшілік етуімен өткен қоғамдық тыңдау отырысына «Шығысэнерготрейд» ЖШС директорының орынбасары Мстислав Мартемьянов, үкіметтік емес ұйым өкілдері және қоғам белсенділері қатысты.
Жиында сөз алған Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаменті басшысының міндетін атқарушы Наталья Петрова «Шығысэнерготрейд» ЖШС ағымдағы жылдың 1 шілдеcінде аталмыш департаментке тарифті өсіру жөнінде өтініш бергенін атап өтті. Бұл өтініш бойынша электр энергиясының алдағы уақыттағы орташа тарифі, қосымша құн салығын есептемегенде, 1 квт электр қуаты үшін 11,574 теңгені құрамақ. Яғни, бұл 9,95 пайыз өсімді құрап отыр. Наталья Петрованың сөзіне сүйенсек, 2016 жылдың 15 тамызынан бастап «Шығысэнерготрейд» мекемесі электр жарығының бағасын қымбаттатуға мәжбүр. Себебі электр энергиясын тасымалдау да, сатылым бағасының тарифі де артқан. Сонымен қатар «КЕGОК» АҚ-ның жүйелік қызметінің тарифі де қымбаттаған.
— Электр қуатының қымбаттауының негізгі себебін компания электр энергиясына кететін шығынмен түсіндіреді. Бұдан өзге «Шығысэнерготрейд» ЖШС құны 160 млн. теңгені құрайтын инвестициялық жобаны жүзеге асырмақ. Бұл бағдарлама аясында автоматтандырылған төлем терминалдарын сатып алу да көзделіп отыр,- деді Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаменті басшысының міндетін атқарушы Наталья Петрова.
Айта кетуіміз керек, ағымдағы жылы электр тасымалдаушы мекеме электр қуатын қымбаттатуды сұрап, шаһарымызда төрт рет қоғамдық тыңдау өткізген. Бұл жиындарда электр энергиясын жеткізуші компания жұмысына бірқатар сын пікірлер де айтылған болатын. Әсіресе қоғам белсенділері Семей қаласында қойылған екі төлем терминалының жеткіліксіз екенін айтқан еді. Аталған инвест бағдарламада осы ескертпелер ескерілген сыңайлы. Өйткені «Шығысэнерготрейд» ЖШС төлем жасайтын автоматтандырылған 30 терминал алуды көздеп отыр. Ал оған 30 млн. теңге қаржы жұмсауды жоспарлап қойған. Бұдан өзге инвест бағдарлама аясында тұтынушылармен байланыс орталығын жетілдіру және мекемеге қажетті техникалар сатып алу жоспарлануда.
Қоғамдық тыңдауда мінбеге көтерілген «Шығысэнерготрейд» ЖШС директорының орынбасары Мстислав Мартемьянов тарифтің көтерілуіне байланысты енгізіліп отырған осы инвестициялық бағдарламаға кеңінен тоқталды. Дегенмен ол жарықтың көтерілуінің басты себебін электр энергиясын жеткізуші компаниялармен байланыстырды.
Осы жолы «Шығысэнерготрейд» ЖШС мекеменің жалға алып отырған ғимараты туралы ешқандай пікір білдірмеді. Өткен жолғы тыңдауларда жеке ғимарат тұрғызып немесе сатып алу үшін де электр жарығының құнын арттыру керектігі жайында айтқандары қоғамдық тыңдауға қатысқандардың әлі де есінде.
Қоғамдық тыңдауда тағы бір түйткілді мәселенің жайы белгілі болды. Айталық, электр қуатының қымбаттауын «КЕGОК» АҚ, ШҚ АЭК және «Казцинк Энерго» ЖШС сынды ірі мекемелермен байланыстырған «Шығысэнерготрейд» ЖШС директорының орынбасары Мстислав Мартемьянов аталған мекемелердің қазірден электр энергиясын көтергенін атап өтті. Мәселен, «КЕGОК» АҚ тарифті өсіруді алдағы бес жылға бекітіп қойған екен. Осы жайт қоғамдық тыңдауға қатысқандардың ашуын туғызды. Белсенділер, егер «КЕGОК» АҚ тарифті көтеруді заңды түрде бекітіп алған болса, «Шығысэнерготрейд» ЖШС тарапынан өткізіліп отырған қоғамдық тыңдаудың бос әурешілік екенін айтты. «Өйткені «Шығысэнерготрейд» ЖШС-нің тарифті көтеру туралы ұсынысын құптамай, компанияны шығынға батырудың пайдасы жоқ»,- дейді қоғамдық тыңдауға қатысушылар. Осы ретте жиналғандар халық қалаулыларына сауал жолдап, мәселені заң жүзінде ретке келтіру керектігін атап өтті. Бұған қоса қоғам белсенділері Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаментіне аталған мәселені жан – жақты талқылау қажеттігін жеткізді.
Сонымен қатар семейліктерді тұтынушылардың ыңғайлылығы үшін алынғалы отырған 30 төлем терминалының жайы алаңдатты. Белсенділер аталған құрылғылардың қаншасы шаһарымызға қойылатынын сұраған еді. Алайда бұған да нақты жауап айтылмады.
Жалпы, қоғамдық тыңдауда Табиғи монополияларды реттеу және бәсекелестікті қорғау комитетінің Шығыс Қазақстан облысы бойынша департаменті мен «Шығысэнерготрейд» ЖШС өкілдері семейліктерден түскен талап-тілектердің ескерілетінін жеткізді.
Өңірдегі тарифтің көтерілуіне байланысты соңғы шешім 30 шілде күні қабылданады.
Асан МЫРЗАХАН, «Семей таңы»
