Өткен жұма күні Семей қаласы әкімдігінде облыстық «Мерейлі отбасы», республикалық «Ұмытылған ұлттық тағамдар» байқауларының жүлдегерлерін құттықтау және оқушылардың қауіпсіз жазғы демалысын ұйымдастыру мәселелері бойынша жиын өтті.
Семей қаласы әкімінің орынбасары Надежда Шарованың төрағалығымен өткен жиынға «Жанұя орталығының» атқарушы директоры, қалалық ІІБ мен құтқару қызметінің мамандары, дербес бөлім басшылары қатысты.
— Қай уақытта болмасын мемлекеттің дамуы қоғамдағы отбасының ахуалымен айқындалған. «Қазақстан — 2050» Стратегиясында әлеуметтік салаға, отбасы мәселесіне басымдық берілген. Отбасылық құндылықтарды жоғары бағалаған Мемлекет басшысының бастамасымен «Мерейлі отбасы» байқауы жыл сайын өткізуде. Биылғы жылы облыста өткен байқауға қатысқан семейліктерге алғыс білдіргім келеді, олар азаматтық белсенділік танытты,- деп жылы лебізін білдірген Надежда Шарова отбасы баға жетпес құндылық екенін тілге тиек етті.
Өз кезегінде «Жанұя орталығының» директоры Людмила Асташкина облыстық «Мерейлі отбасы» байқауына Семей қаласынан бірнеше отбасы қатысқанын, соның екеуі аталмыш орталықтың қолдауымен бақ сынағанын атап өтті.
— Ұрпақтарына ұлттық өнерді ұлықтап, мәдениет пен әдебиеттен сыр шертетін отбасылар баршылық. Солардың бірі және бірегейі деп Түкібаев пен Туғанбаевтар отбасын айтуға болады,- деген Людмила Асташкина облыстық байқау жеңімпаздарын ортаға шақырды.
Семей қаласының әкімі Ермек Сәлімовтің атынан қала әкімінің орынбасары Надежда Шарова екі жанұяға отбасылық құндылықтарды сақтауға және насихаттауға, «Қазақстан-2050» Стратегиясының жүзеге асуына атсалысқандары үшін, сондай-ақ «Мерейлі отбасы» байқауына белсене қатысқандары үшін алғыс хат табыс етті.
Түкібаевтар отбасы облыстық «Мерейлі отбасы» сайысында 1 орын алған. Түкібаевтар әулеті — мәуелі бәйтерек. Сыннан сүрінбей, көрермендерінің көзайымына айналып, «Шығармашылық отбасы» номинациясын жеңіп алған Туғанбаевтар жанұясы да өнерден құралақан емес. Өткен жылы да «Толағай», «Әже мен немере» конкурстарына қатысып, жүлде еншілеген. Әулеттің келіні Айнұр Жакенованың айтуынша, шаңырақта салт-дәстүр сақталып, ұлттық құндылықтар ерекше бағаланады. Ата-енесі мен жолдасына бақыт сыйлап отырған Айнұр келін Еламан, Думан, Дамир, Даниал сынды төрт ұл тәрбиелеуде. Ұлдарының бірі гитарада, екіншісі домбыра мен фортепианода ойнап, спортпен және бимен айналысады. Шынымен-ақ өнерлі, өрелі отбасы.
Осы жылы алғаш рет республикалық «Ұмытылған ұлттық тағамдар» байқауы ұйымдастырылған. ШҚО аудан, қалаларының атынан 15 ұйым қатысқан байқаудың облыстық кезеңіне қаламыздан Қазақ ұлттық-мәдени орталығы қатысып, 1 орын алған. Тараз қаласында өткен республикалық қорытынды сында бақ сынасқан семейліктер үздіктер қатарынан табылған. Бұл жетістіктері үшін Қазақ ұлттық-мәдени орталығын және оның төрайымы Шаған Жанаеваны қала әкімінің атынан Надежда Шарова алғыс хатпен марапаттады. Ш.Жанаева өз сөзінде материалдық және рухани қолдау танытқан Әйелдер ісі және отбасы-демографиялық саясат жөніндегі облыстық комиссияның мүшесі Жанна Жибраеваға алғыс айтып, байқау барысы жайлы қысқаша мәлімет беріп өтті.
— Қазақтың ұмытылып бара жатқан ұлттық тағамдарын насихаттауға арналған ірі көлемдегі байқауға қатыстық. Семей жерінен, Абай, Мұхтар, Шәкәрім елінен барған соң тосылып қалуды жөн көрмедік.«Абай жолы» роман-эпопеясы бойынша шәкірт Абайды еліне оралған кезінде әжесі Зере мен анасы Ұлжанның қарсы алатыны жайлы айтылған үзіндіден көрініс көрсету арқылы қарын бөртпесі атты ұлттық тағамымызды ұсындық. Бұл біздің ерекшелігіміз болды,- деген Қазақ ұлттық-мәдени орталығының төрайымы Тараз жеріндегі қызықтарымен, алған әсерлерімен бөлісті.
Күн тәртібінде келесі ретте оқушылардың қауіпсіз жазғы демалысын ұйымдастыру мәселелері қаралды. Тақырып бойынша баяндама жасаған білім бөлімінің басшысы Наталья Фесенко жазғы демалыс лагерьлерінің жұмысымен таныстырды.
— Биыл оқушылардың жазғы демалысын ұйымдастыруға 10 млн. 252 мың теңге бөлінді. Аз қамтылған отбасыларда тәрбиеленуші 466 балаға тегін жолдама берілді. Демалыс 14 күнге жоспарланған. 5 уақыт ыстық тамақпен қамтылады, ақылы түрде күніне 2200 теңге,- деген білім бөлімінің басшысы лагерь басында медбике, тәрбиешілер, дене шынықтыру пәнінің мұғалімдері мен өзге де мамандар оқушылардың қауіпсіздігін қадағалайтындықтарын атап өтті. Сонымен бірге Н.Фесенко демалыс үйлерінің жөндеу жұмыстарына сұранып тұрғандығын, материалдық-техникалық базалардың ескіргенін тілге тиек етті.
«Түріксібке 50 жыл» жазғы демалыс лагері көшбасшыларды қабылдаса, «Радуга» спорттық бағытта, «Жас қанат», «Жас жұлдыз» тілдік бағытта жұмыс істейді. Балалар мен жастардың шығармашылық сарайында және биологиялық орталықта, сондай-ақ мектеп жанынан лагерьлер ұйымдастырылған. Семейлік оқушылар Үржар ауданында Алакөлдің жағалауында орналасқан «Үржарайым» лагеріне, Өскемендегі «Матросов» сынды лагерьлерге жолдама алған. Республикалық жолдама бойынша аз қамтылған отбасынан №39 мектептің бір оқушысы шілде айының соңында Италияға демалуға барады.
Әйгерім СӘРСЕНҒАЛИ, «Семей таңы»
