Жаймашуақ жаздың жыл керуеніне ілесе жылжып, қоңыржай күзге жол беретін, балапанын ұшуға баулыған әнші құстардың алыс сапарға қанаттарын қомдап, тіршілік атаулы етек-жеңін қымтайтын шақта, осы бір арайлы күні – 23-ші тамызда жүрегімізді жыр тербейді.
Ұлы ақын дүние есігін ашқан күн! Адамзат өркениетінің алтын қорына мәңгілік асыл мұра қосқан данышпан Абай Құнанбайұлы өмірге келген күн – 23-ші тамыздың күнтізбеде алар орны айрықша. «Елім» деп елжіреген ақынның қайран қазағын жаһанға танытқан жауһар жырлары ой жетпес ғажайып шың!
Біз, Семейдегі Абай шаңырақтары өзара ақылдаса келіп, бұдан былай ұлы ақын дүниеге келген күнді, 23-ші тамызды «бір жағадан – бас…» шығара отырып, ел-жұрттың қалың ортасында қуаныштауды ұйғардық. Абайдың туған күні ақын ескерткіштеріне гүл шоқтарын қоюдан басталады. Айтулы күнді нақты әрі мазмұнды шаралармен атап өту перзенттік парыз. Мерекелік салтанат ұлы ақынның өмірі мен шығармашылығын паш ететін, яғни Абай алақанының табы қалған жәдігерлер сақтаулы Абай музейінде кешкі сағат 17. 00- де болады.
Ал оған дейін Абай атындағы облыстық кітапханада «Ұлы дала елінің ұлы ақыны» экспозициясы, Абай атындағы облыстық театрда «Хакім Абай ұлағаты» кітап көрмесі ұйымдастырылады. Ақын атындағы театр ұжымы, сондай-ақ Абай музейінің күмбезді ғимараты алдындағы сахнада арнайы қойылым шымылдығын ашады.
Сонымен қатар 23-ші тамызда Абай музейінде тұсауы кесілетін «Шыңғыстау» сурет галереясы келушілерді ұлы ақынның атамекенінде саяхатта жүргендей әсерге бөлейді деген сенімдеміз. Бұған қоса «Абай» өнер мектебінде тоғызқұмалақ пен дойбыдан облыстық бәсеке өрістеп, «Экспонат» тарихы жобасы ауқымында Абайдың түпнұсқа суреттерінің таныстырылымы өткізіледі және хакім туралы фильмдер көрсетіледі, ал ақындар «Алтыбақан» жанында жыр тиегін ағытып, әншілер мен бишілер өнер көрігін қыздырады. 23-ші тамызда ақын музейінің есігі түнгі 23.00-ге дейін айқара ашылып, келушілерге тегін қызмет көрсетіледі. Сөйтіп, киелі қара шаңырақта музей түні енді жылына екі рет ұйымдастырылып, асыл мұрамен танысқысы келетіндерге мейлінше қолайлы мүмкіндік туады.
Келіңіздер, көріңіздер, ардақты Абай ұрпақтары!
Болат ЖҮНІСБЕКОВ, Абайдың «Жидебай-Бөрілі» мемлекеттік қорық-музейінің
Директоры.
Отантай КӘРІБЖАНОВ,«Абай» қоғамдық қорының Президенті.
Мұратбек ОСПАНОВ, «Абай» журналының директор—редакторы.
Гүлнар ЖІГІТБАЕВА, Абай атындағы облыстық кітапхананың директоры.
Бауыржан ТӨЛЕКОВ, Абай атындағы облыстық музыкалы—драма театрдың директоры.
Сурет авторы Нұрбұлан ӨТЕПБАЕВ.
