Қаңтар айының 11-13 күндері ҚР Парламенті Мәжілісінің бір топ депутаттары Семей қаласына арнайы сапармен келді. Халық қалаулылары қаланың үкіметтік емес ұйымдарымен, Қоғамдық кеңес өкілдерімен, құқық қорғау, сот, прокуратура қызметкерлерімен, әскерилермен, қалалық мәслихат депутаттарымен және қарапайым еңбек адамдарымен кездесулер өткізіп, «Нұр Отан» партиясының Семей қалалық филиалында қоғамдық қабылдаулар өткізді.
«Нұр Отан» партиясының Семей қалалық филиалының қоғамдық қабылдау бөлмесінде ҚР Парламенті Мәжілісінің депутаты Василий Олейник азаматтарды жеке сұрақтары бойынша қабылдады. Азаматтарды қабылдауға сонымен қатар қалалық прокуратура, ішкі істер басқармасы мен қалалық әкімдіктің дербес бөлімдерінің өкілдері қатысты.
Қабылдауға алғаш болып жүгінген қала тұрғыны Кәмшат Сұлтанбекова ұлының сегіз жылға сотталғанын, мұндай сот шешімімен келіспейтінін айтып, халық қалаулысынан көмек көрсетуін өтінді.
— Ұлым мені қорғағаны үшін қасақана қылмыс жасады деген негізде сегіз жылға сотталды. Сот шешімімен келіспеймін. Мені қорғағаны үшін жазықты болып отыр. Біз апелляцияға бердік,- деді шағымын айта келген ана.
Депутат Василий Олейник мәселенің мән-жайын түсіндіріп, өзінің атына хат жазуды, одан кейін онымен мұқият танысып, еліміздің Бас прокурорына жолдайтынын атап өтті. Халық қалаулысы сот барысына араласа алмайтынын, алайда құзырлы орган істің заңдылығын тексере алатынын мәлімдеді.
Ал қалалық ардагерлер кеңесінің мүшесі Амангелді Жұманов Семейдегі уақытша ұстау изоляторының жабылып, облыс орталығында ғана қалатынын, бұл шаһар тұрғындарына айтарлықтай қолайсыздық тудыратынын атап өтті.
— Уақытша тіркеу мәселесі де жастар үшін қиынға соғайын деп тұр. Әсіресе ауыл жастары алаңдаулы. Қазір қала маңындағы елді мекендерде тұратын жастар, қыс кезінде жұмыс болмағандықтан, Семейге келіп жұмыс істейді. Отбасын асырау үшін екі-үш айға қалаға келіп жұмыс жасауға мәжбүр. Ал енді олар қайда барып уақытша тіркеуге тұрады? — деді Амангелді Жұманов.
Семейлік ақсақал сонымен қатар шаһарға ерекше статус беру керектігі туралы, жұмыссыздық, дәрі-дәрмектің қымбаттауы, қоғамдық көліктегі жеңілдіктердің алынып тасталуы сынды мәселелерді көтерді.
Мәжілісмен барлық айтылғандардың ескерілетінін, тиісті жұмыстар атқарылып, бақылауға алынатынын айтты.
Халық қалаулылары бейсенбі, жұма күндері қалада бірқатар кездесулер өткізді. Атап айтқанда, ҚР Парламенті Мәжілісінің депутаты Артур Платонов қалалық прокуратура өкілдерімен, «Шығыс» өңірлік қолбасшылығының әскерилерімен және «Нұр Отан» партиясы қалалық филиалының активімен кездесу өткізіп, 13 қаңтар күні «Семей инжиниринг» АҚ-да болды. Сондай-ақ бұл күндері ҚР Парламенті Мәжілісінің депутаттары Анар Жайылғанова, Айзада Құрманова мен Александр Суслов та Семейде болып, тұрғындармен кездесулер өткізді.
Асан МЫРЗАХАН, «Семей таңы»