Қыстың қамын жазда ойлаған жақсы. Алайда қала тұрғындарының көбісі қысқа қамдануды әдетте қазан айынан бастайды. Нәтижесінде көмір қоймаларында ұзын-сонар кезек пайда болып, қиындық туындайды. Жергілікті БАҚ өкілдері қалада көмір тапшы деген ақпарат таратқаннан кейін, қала әкімі Ермак Сәлімов мәселенің мән-жайын анықтау мақсатында «Жігер-СТ» ЖШС-ның көмір қоймаларына барып, жағдайды бақылап қайтты.
«Қаражыра» кен орнының көмірін сатумен Семейде «Жігер-СТ» ЖШС айналысады. Жылу орталықтары мен мекемелерді, білім беру ордаларын қоспағанда жеке тұрғын үйлер үшін 40 мың тонна көмір қажет екен. 25 мың тонна көмір қазіргі уақытта Қаражыра кен орнынан сатып алынған. «Жігер-СТ» ЖШС қызметкерлерінің сөзіне қарағанда, келісімшарт бойынша күніне 20 вагон Семей қаласына көмір тасымалдаумен айналысады. Орта есеппен күніне қалаға 800-1000 тонна көмір келсе, оның 200 тоннасы аудандар мен ауылдарға жөнелтіледі.
— Көмір қалаға уақытында жеткізіліп отыр. Мемлекеттік мекемелер мен көп қабатты үйлер үшін жылу орталықтары көмірмен толық қамтамасыз етілді. Біз мұнда жеке тұрғын үйлерді көмірмен қамтамасыз етуді бір жолға қою үшін жиналып отырмыз. Жеке көлік жүргізушілері осы қоймадан көмірдің тоннасын 7 мың теңгеден алып, көтерме бағамен сатып жүр. Қаражыра кен орны қаланы мөлшермен қамтамасыз етуде. Сондықтан алаңдайтын мәселе көріп отырған жоқпын. Қыс басында сарылып кезек күткенше, мүмкін болса тұрғындардың көмірді жазда алып қойғандары дұрыс, — дейді қала әкімі Ермак Сәлімов.
— Өткен жылдан бері «Қаражыра» кен орнынан 1 млн. 200 мың тонна көмір сатып алынды. Шығыс Қазақстан облысы көмір тасымалын ерте бастаған жалғыз облыс екенін де айта кеткеніміз жөн. Көмір вагондарының қозғалысын бақылап, қоймаға уақытында жеткізілуін қадағалап отырмыз, — дейді Семей жол бөлімшесінің басшысы Марлен Көкірекбаев.
Мәселенің мән-жайына қаныққан соң қала әкімі көлік жүргізушілермен тілдесіп, пікірлерін тыңдады.
— Көмір тасымалы үшін қоймаға алдын-ала кезек қоямыз. Алдыңғы күні кезек қойғанмын, көмірді әлі күтіп тұрмын. Қоймаға күніне 5 вагон ғана келеді, кейде күн аралатып жетеді. Соңғы екі-үш күнде ғана 10 вагон келіп отыр. Күніне 5 ауыр жүк көлігі келсе, 3 вагон көмірді жоқ деп есептеуге болады. Семейден бөлек, қалаға қарасты бірнеше ауданның жүк көліктері де осында келеді. Сол себепті Семейге көмір толық жеткізіліп отырған жоқ, — дейді Марат Сембаев есімді жүргізуші.
«Жігер-СТ» ЖШС басшысы Болатхан Мұсабаевтың айтуынша, аудандар мен ауылдарды қатты отынмен қамту үшін күніне 40 вагон, яғни 2400-2800 тонна көмір аялдау пунктіне жеткізіледі. «Аялдау пунктінде көмірдің тоннасы 5800 теңгеден сатылып жатыр. Сондықтан сіздер аудандардан келген жүргізушілерге аялдау пунктіне баруды ескертулеріңіз керек. Біз мұндағы жүргізушілердің қай жерден келгенін анықтап жатпаймыз», — дейді Б. Мұсабаев.
Ермак Сәлімов жауапты қызметкерлерге жағдайды қатаң бақылауға алып, реттеуді тапсырды.
Жадыра ТӨЛЕГЕНҚЫЗЫ, «Семей таңы»
