20 қаңтар күні Абай атындағы әмбебап кітапханада шаһардағы үкіметтік емес ұйымдардың өкілдері бас қосып, Президенттің биылғы жылғы «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын талқылады.
Семей қаласы ішкі саясат бөлімінің басшысы Айдар Садырбаев бұл Жолдау «Қазақстан-2050» Стратегиясымен, «100 нақты қадам» Ұлт жоспарымен сабақтасып жатқанын, мемлекетімізді дамытуға арналған бағдарламалардың жалғасы екенін айтып, жан-жақты тұшымды пікір білдіре отырып, негізгі міндеттерге тоқталып өтті.
Үкіметтік емес ұйым өкілдері барлық салалар бойынша еңбек ететінін атап өткен саясаттану ғылымдарының докторы Гүлнар Искакова саяси маңызды құжаттың басым бағыттарын жіктеп берді. Ол мемлекет басшысы ең алдымен инновациялық дамуға, цифрлық Қазақстанды қалыптастыруға көңіл бөлгенін айтып, үкіметтік емес ұйымдардың назарын азаматтық қоғамның дамуына атсалысуға, ІТ-технологияны енгізуге, экологиялық мәселелерді шешуге, адами капиталдың әлеуетін арттыруға қатысты міндеттерге аудартты.
Ал Семей қаласының Шәкәрім атындағы мемлекеттік университетінің оқытушысы Нәзигүл Ғазизова Жолдаудың жетінші бөлімінде білім саласына қатысты маңызды міндеттер мен оларды шешу жолдары көрсетілгенін атап өтті.
Сонымен қатар жиынға қатысқан үкіметтік емес ұйымдар өкілдері маңызды құжатта көрсетілген он міндет жайында пікір білдіре келіп, оны жүзеге асыруға бір кісідей атсалысатындарын мәлімдеді.
Басқосуда әлеуметтік салада орын алған өзгерістер (зейнетақы, атаулы әлеуметтік көмек), үкіметтік емес ұйымдардың өз қызметі жөніндегі мәліметтерін ұсынуы және олар туралы дерекқорды қалыптастыру қағидаларындағы өзгерістер туралы да айтылды.
Әйгерім СӘРСЕНҒАЛИ, «Семей таңы»
