Шығыс Қазақстанда ауыл әкімдерін оқытуға бағытталған елдегі тұңғыш пилоттық жоба басталды. Ол аймақ басшысы Даниал Ахметовтің жеке бастамасымен құрастырылған. Бастаманы ҚР Мемлекеттік қызмет істері және сыбайлас жемқорлыққа қарсы іс-қимыл агенттігі де қолдады.
50 әкімге арналған алғашқы дәрісті облыс басшысы Даниал Ахметов өзі оқыды. Елбасы Нұрсұлтан Назарбаев туралы тың деректермен бөлісіп, қазіргі егемен Қазақстанды құру жолындағы зор еңбектің рөлін ерекше атап өтті. Дұрыс таңдалған саяси-экономикалық модельдің арқасында Қазақстан ширек ғасыр ішінде ТМД елдеріндегі өркениетті әрі тұрақты мемлекетке айналды. Бүгінде әр ауылдық округ әкімі өз бюджетін құру мүмкіндігіне жетіп отыр. Айта кету керек, Шығыс Қазақстанның 100 ауылдық округі жаңа жылдан бастап дербес бюджет алды. Дәл осы округтердің әкімдері Өскеменде кезең-кезеңімен оқу оқып, біліктіліктерін шыңдайды. Оқу кезеңі бюджетті құру, қарау, бекіту және орындаудан бастап ауқымды тақырыптарды қамтиды.
— Мемлекетік менеджер ретінде сіздер аумақтарыңыздағы әлеуметтік-экономикалық мәселелерді шешесіздер. Биыл дербес бюджет алдыңыздар. Енді ескерте кетейін, оңай түспес бюджеттік үрдісті басқарасыздар,– деді ауыл әкімдеріне аймақ басшысы Даниал Ахметов. – Міндеттерді тиімді орындау, мемлекеттік басқару жүйесін жақсарту үшін Қазақстанда бірінші болып арнайы бағдарлама құрастырдық. Оған сәйкес әр басқарма басшысы тиісті материал бойынша сіздермен жұмыс істейді. Тапсырмама сай, басшылар іс-әрекет алгоритмін де жасап береді. Тек жұмыс істесеңіздер болды.
Семинар төрт бөлімнен тұрады. Бірінші – бұл Қазақстанның тарихи дамуы мен қалыптасуындағы мемлекеттік үрдістер. Екінші бөлім мемлекеттік жоспарлау мен үкіметтік бағдарламаларды орындауға арналады. Сондай-ақ әкімдерді мемлекеттік қолдау мен коммуналдық меншікті басқару механизмін қолдануға үйретеді.
Атап өтсек, барлық тренерлер, яғни басқарма басшылары, ҚР Президенті жанындағы мемлекеттік басқару академиясында арнайы тренингтен өтті.
ШҚО әкімінің баспасөз қызметі.
