Биыл кеңес әскерінің Ауған жерінен шығарыл-ғанына 25 жыл толды. Осы атаулы күнге орай қаламызда ауқымды шаралар ұйымдастырылды. Акция аясында Ауған соғысы құрбандары ескерткішінің алдында еске алу митингісі өтті.
Салтанатты жиынға Ұлы отан соғысы ардагерлері, зиялы қауым өкілдері, Ауған соғысы ардагерлері мен сол соғыста қаза болған жауынгерлердің ата-аналары, оқу орындарының студенттері, Шығыс өңірлік қолбасшылығының әскерилері қатысты.
Митинг Ауған соғысы құрбандарының ескерткішіне гүл шоғын қою рәсімімен басталды. Содан соң жиналған қауым Ауған жерінде, майдан даласында қаза тапқан сарбаздарды еске алып, бір минут үнсіздік жарияланды. Шараның негізгі бөлігі тәмамдалғаннан кейін сөз алған қала әкімінің орынбасары Зәуреш Исабаева Ауған соғысына бұрынғы Семей облысының бір өзінен 1100 жауынгер қатысқанын, олардың 46-сы ұрыста оққа ұшып, 2-уі із-түссіз жоғалғанын тілге тиек етті. Сондай-ақ, З.Рамазанқызы өз сөзінде: «Қыршын кеткен жастардың ерлігі мен есімдері әр кез жерлестерінің жүрегінде сақтаулы. Олардың есімдерін ел болып ұлықтау біздің борышымыз бен парызымыз. Ауған соғысында қаза болған боздақтарға арналған мына ескерткіш семейліктердің ерлікті қадірлей білетіндігінің белгісі деп айтуға болады. Бүгінде Семей қаласында Ауған соғысының 540 ардагері бар. Олардың қоғамға сіңіріп келе жат-қан еңбектері, ел мен жерге деген сүйіспеншіліктері жастардың па- триоттық сезімін арттыруға тікелей ықпал етуде», — деді.
{jcomments on}Осыдан соң сөз алған Шығыс өңірлік қолбасшылығы әскери қолбасшысының орынбасары полковник Азамат Мұқатаев та бүгінгі атау-лы күннің мән-мағынасына тоқталып өтті. «Қиырдағы Ауған жерінде отандастарымыз ерлік пен адамгершіліктің тамаша үлгісін таныта білді. Қақаған аяз бен қапырық ыстықта да Отан алдындағы борыштарын адал атқарды. Өздеріне жүктелген міндетті толық орындауға жандарын салды. Сондықтан да олар мәңгі біздің есімізде қалады, сол үшін де біз оларды құрметтеуіміз керек», — деп түйіндеді сөзін полковник. Ауған жерінде ерліктерімен танылған алдыңғы буын ағаларының жолын жалғаған қазіргі офицердің бұл соғыстың ардагерлеріне деген лебізі осындай болды.
Салтанатты жиында жиналған жұртшылық алдында Ұлы отан соғысы ардагерлерінің атынан Ғазиз Ахмеров ақсақал сөз сөйледі. Ардагер өз кезегінде ауған соғысына қатысқан сарбаздардың Ұлы Отан соғысында ерліктің талай үлгісін көрсеткен батыр аталары мен әкелерінің лайықты ізбасарлары бола алғандықтарын тілге тиек етті. Сондай-ақ, ол соғыс құрбандарын еске алып, арамызда жүрген ардагерлерді құрметтеу парызымыз екенін айта келіп, бүгінгі бейбітшіліктің мәңгілік болуын тіледі.
Митинг барысында соңғы болып қалалық ауған соғысы ардагерлері кеңесінің төрағасы Боранбай Бегатов сөйледі. Өз сөзінде ол Ауған жерінде Отан алдындағы борыш- тарын абыроймен атқарған байырғы жауынгерлердің бұдан былай да еліміздің, қала берді қаламыздың қоғамдық өміріне белсене араласып, жастарға патриоттық тәрбие беру мақсатында жүргізіп жатқан жұ-мыстарын жалғастыра беретіндерін айтты. Сондай-ақ, Боранбай Бегатов Ауған соғысы ардагерлерінің ата-аналарына алғысын білдіріп, зор денсаулық тіледі.
Осындай жылы лебізге толы сөздер айтылып, Ауған соғысы ардагерлерінің ата-аналарына шынайы тағзымның белгісі іспеттес гүл шоқтарын табыс ету рәсімі аяқталған соң аталмыш шара Абай атындағы театрда жалғасын тапты. Мұнда да алғашқы болып сөз алған қала әкімінің орынбасары Зәуреш Иса-баева жиылған қауымға құттықтау тілегін білдірді. Сондай-ақ, қаламыздағы патриоттық тәрбие жұмыстарына белсене қатысып жүрген Ауған соғысының ардагерлеріне қала әкімі Айбек Кәрімовтың атынан Алғыс хаттар табыстады. Осыдан соң сахнаға шыққан Шығыс өңірлік қолбасшылығы әскерилері қолбасшысының орынбасары полковник Азамат Мұқатаев қазіргі таңда қарулы күштер қатарында қызмет етіп келе жатқан, ерен еңбектерімен көзге түскен Ауған соғысы ардагерлерін мерейтойлық медальдармен, Шығыс өңірлік қолбасшылығының арнайы грамоталарымен және бағалы сыйлықтармен марапаттады.
Атаулы күнге орай еліміздің әр шетінен, алыс-жақын шетелдерден қазақ еліндегі бейбітшіліктің мәңгі болуын, халықтың бақуатты болуын тілеген хаттардың келуі игі дәстүрге айналған. Осы жолы да қызыл империя әскерінің Ауған жерінен шығарылуының 25 жылдық мерейтойы ескерусіз қалмады. Кезегімен сахнаға шыққан қалалық Ауған соғысы мен жергілікті соғыстар ардагерлері кеңесінің төрағасы Боранбай Бегатов әр түрлі ұйымдардан келіп түскен құттықтау хаттарды оқыды. Олардың арасында Тәуелсіз мемлекеттер достастығының интернационалист-жауынгерлер жөніндегі комитеттің, еліміздің түкпір-түкпіріндегі ардагерлер кеңестерінің құттықтаулары болды.
Театрда өткен акцияның маңызды тұсы — Ауған соғысы ардагерлерінің ата-аналарына арнайы мерейтойлық медальдардың табысталу сәті болды. Үлкенге құрмет көрсетуді ешқашан ұмыт қалдырмайтын қалалық Ауған соғысы және жергілікті соғыс ардагерлері кеңесінің бұл жолғы бастамасы да жиылған қауым тарапынан қошеметке ие болды.
Салтанатты шара қалалық өнерпаздар ұжымдары әзірлеген мерекелік концертке ұласты. Дәулескер күйшілеріміздің туындылары орындалып, отанды сүю, туған жерді қорғау тақырыбындағы әскери-патриоттық әндер шырқалды. Осылайша кеңес одағы әскерінің ауған жерінен шығарылғанының 25 жылдығы қаламызда кең көлемде аталып өтілді.
Мирас ҚҰСАЙЫН,
«Семей таңы»
