Өткен аптадағы теңге бағамының күрт өзгеруінен туындаған мәселелерге мұқият мән беру кезекті аппараттық кеңестің негізгі тақырыбына айналды. Қала әкімі Айбек Кәрімов бұл бағытта жедел құрылған жұмыс тобының жетекшісі Жағыпарбек Елубаевқа тауар бағаларының ырықтан шықпау керектігін қайталап тапсырды. «Қайталап тапсырды» деуіміздің себебі 11 ақпан күні өзі бас болып жедел жұмыс тобын құрған сәтте жүктеген міндеттерді қала басшысы топ жетекшісімен тағы бір мәрте талқылады. Жағыпарбек Елубайұлының айтуына қарағанда азық-түлік бағасының ауытқуына жол бер-меудің нақты іс-шаралары қолға алынған. Соңғы 3 күн ішінде 50 шақты дүкендер мен сауда орталықтарындағы өнімдердің құнына сараптау жұмыстары жүргізіліп, ақпарат құралдарының қатысуымен рейдтер жасалыпты. Әсіресе, әлеуметтік тауарлардың қолжетімділігін қамтамасыз ету бірінші кезекте жүйеленген. Бірінші сортты нан сол 45-50 теңгелік қалпында. Нан және басқа да күнделікті азық-түлік құнын қалыпты сақтауға қатысты кәсіпкерлік бөлімі өнім өндірушілер мен таратушыларға қатысты 189 меморандум жасаған. Қаланың барлық аумағындағы сауда нүктелері бойынша баға тұрақтылығын сақтау жөнінде түсіндіру жұмыстары жүргізу жалғаса бермек.
«СемНан» мен «Шығыс нан өнімі» серіктес-тіктері секілді «Ақтөбе Ертіс» өнімін таратушы «Шығыс-Самғау» серіктестігі де сауда орындарына жұмыртқа мен құс етін белгіленген бағамен жеткізуге келіскен. Кәсіпкерлік бөлімі мен «Шығыс-Самғау» серіктестігі тұрақтандыру қорының өнімдерін нүктелерге жеткізуді үйлестіре түсуді қолға алды. Мақсат -тұрақтандыру қоры өнімдерін саудалау нүктелерін көбейту. Нәтижесінде төмен бағадағы көкөніс түрлерін сатуға тағы да 25 дүкен иелерімен келісім жасалып, арнайы орындар белгіленген. Сонымен бірге жұмыс тобы арнайы брифинг өткізіп, осы тақырыпқа қатысты журналистердің сұрақтарына нақты жауаптар қайтарды. Дәрі-дәрмек пен жанар — жағар май бағасы да назарға алынып отыр. «Ертіс» әлеуметтік-кәсіпкерлік корпорациясының тұрақтандыру қорында көкөніс пен картоптың қажетті қоры бар. Қоймада 3 мың тонна картоп, 440 тонна сәбіз, 650 тонна орамжапырақ, 300 тонна сарымсақ пен 120 тонна қызылша сақтаулы. Сондай-ақ, күнбағыс майы, күріш пен қант және жарма өнімдерінің қоры да бар. Келесі күндерде Ж.Елубаевтың жетекшілігімен тұрмыстық техника саудалайтын орындардың басшыларымен кездесіп, түсіндіру жұмысын жүргізді. Жұмысшы топтың тағы бір нәтижелі бастамалары — сауда нүкелерін жалға беру құнын төмендету болып отыр. Бүгінгі күнде жал құнын әдеттегіден 10-20 пайыз арзандату жөнінде 7 сауда орталығымен келісім жасалып, олардың қатарын әлі де молайта түсу көзделіп отыр.
{jcomments on}Қала аумағын тиімді бағадағы азықпен қамтамасыз етуге бағытталған тұрақтандыру қорының мүмкіндігімен облыс әкімінің орынбасары Нұрлыбек Шерубаев 16 ақпан күні арнайы келіп, көзбе-көз көріп қайтты. «Приречный» агрофирмасы еншісіндегі қоймалардың көкөніс түрлеріне толып тұрғанына, өнімдердің өз деңейінде сақталғанына тәнті болды. Өйткені, Өскемен маңындағы осы тектес қоймалардың өнімдері сақталу тұрғысынан айтарлықтай көңіл көншітпейтін көрінеді. Сол себептен де облыс әкімінің орынбасары осы қоймадан мүмкіндігінше Өскеменге де өнім апару қажеттігі жөнінде ұсыныс жасады.
Осы орайда бір дерекке тоқтала кетсек. Қойманың өнім сақтау мүмкіндігіне көз жеткізген Н. Шерубаевқа қала әкімі Айбек Кәрімов: — «Приречный» агрофирмасы секілді ірі шаруашылықтарды қолдау үшін олардың жасап жатқан жұмысының ішкі тынысына жан-жақты ден қоюымыз керек. Егер біз осы фирма қоймаларын салқындатқыш қондырғылармен қамтамасыз ететін болсақ, Мұхит Тұрысханұлы бір маусымнан келесі маусымға дейін жетерлік өнім қорын сақтауға мүдделі болады. Жыл бойы бір бағаны өзгеріссіз ұстап тұрарлық өнім қорын жинап, сақтауға шаруашылық қауқары әбден жетеді. Осы мақсатпен жергілікті атқарушы билік атынан былтыр В.Кошелевтың атына бірнеше мәрте ұсыныс-хат жаздық. Алайда, қолдау таппадық. Былтыр салқындатқыш қондырғы орнатып алғанда, сәбіз, картоп, қызылша, орамжапырақты жаңа өнім алғанға дейін қазіргі бағасымен саудалататын едік. Салқындатқыш қондырғы болмағандықтан шаруашылық өнім қорын мамыр айына дейінгі аралыққа ғана шақтап сақтайды. Одан әрі сақтауға температура жағдайы көтермейтіндіктен, артық өнімді ерте күзде көтерме бағамен өткізіп жіберуге тырысады. Нұрлыбек Әбдіғазыұлы, сол себепті салқындатқыш қондырғылары жөніндегі пікірімді өзіңізге де мәлімдей кеткенді жөн көріп тұрмын»,- деді.
Аппараттық кеңеске қайта оралсақ, қала басшысы орынбасарлары мен бөлім басшыларына баға тұрақтылығын қадағалауға қоса басқа да міндеттер жүктеді. Мәселен, ауылшаруашылық және ветеринария бөліміне барлық ауылдық округтер бойынша ауылшаруашылық ісін жүргізудің жүйесін енгізу жобасын әзірлеуді міндеттесе, жер қатынастары бөліміне ауылдық округтердің жер картасын қайта қараудан өткізіп, жаңартуды жүктеді. Сол секілді сәулет бөліміне жаңа құрылыс түсетін мөлтек аудандардың келбетін сипаттайтын жобаларды жеделдетуді, тұрғын үй инспекциясына тозығы жеткен ғимараттарды құлатуға қатысты ұсынысты құжаттандыруды тапсырды. Мәселе желісі көшелерді жарықтандыруға қарай ойысқанда «МЭПС» серіктестігінің директоры Серік Тукеев бір-неше негізгі көшелерде іске қосылмай тұрған «Шам» мекемесінің бағандары бөгет жасап тұрғанын мәлімдеп, ескірген бағандарды орнынан алып тастауға құқық берілуін сұрады. Ол осы ұсыныс заңдастырылған жағдайда, көшені жарықтандыру міндетінен жалтарып жүрген мемкемеге қатысты сұрақтардың шешімін табуға өз ықпалын тигізер еді деген ойын ашық жеткізді.
Ұсыныс тиісті мамандар тарапынан зерделеніп, заңдылық жағы қарастырылатын болды.
Семей қаласы әкімінің баспасөз қызметі.
