Өскемен қаласында «Алтай Invest-2018» халықаралық инвестициялық форумы бастау алды. Ауқымды шараға аймақ басшысы Даниал Ахметов, алыс және жақын шетел инвесторлары, қаржы институттарының өкілдері, ұлттық компаниялар мен мекемелердің басшылары қатысты. Жалпы, 20 мемлекеттен 500-ге жуық делегат Шығыс Қазақстан облысына келді. Форум аясында кездесулер, өзекті мәселелер бойынша роуд — шоу, инвестициялық жобалар көрмесі өтіп, меморандумдар мен келісімшарттарға қол қойылды.
«Алтай Invest-2018» халықаралық инвестициялық форумы — Шығыс Қазақстан аймағын дамыту үшін ең үздік инвестициялық жобаларды анықтауға, сондай-ақ облыстың бизнес әлемін кеңейтудегі міндеттерді орындауға әрі басқа елдермен тәжірибе алмасуға таптырмас мүмкіндік.
Инвестициялық көрме барысында әлеуеті жоғары инвесторларға құны 886,2 млрд. теңге тұратын 110 жоба ұсынылды. Олардың дені туризм, өндіріс, энергетика және тұрғын үй-коммуналдық шаруашылығы, аграрлық өнеркәсіп кешені, мемлекеттік-жекеменшік әріптестік салаларына бағытталды. Аймақтың тұсауы кесілген инвестициялық, соның ішінде инновация және жаңа технологиялар жобалары қосымша қаржы көздерін тарту арқылы кәсіпорындарын өркендетуді көздейтін компаниялар үшін маңызды болмақ. Мысалы, форумға қатысушыларға бекіре тұқымдас балық, сүт, шұжық өнімдерін, құрылыс және әрлеу материалдарын өндіру бойынша жобалар ұсынылды. Сондағы мақсат – табиғи таза, сапалы өнім шығару.
Форумның пленарлық отырысында жиналған қауым ұсынылған жұмыстарды және шетелдермен арадағы ынтымақтастықты нығайту мәселесін жан-жақты талқылады. Кездесу соңында жалпы сомасы 104 млрд. теңгені құрайтын үш меморандумға қол қойылды.
Сонымен бірге «Алтай Invest-2018» форумы шеңберінде өнеркәсіп, энергетика, ауыл шаруашылығы, туризм, мемлекеттік-жекеменшік әріптестік салалары бойынша роуд-шоу ұйымдастырылып, 191,2 млрд-қа 42 келісімшарт жасалды.
— Аймақта әрбір инвесторға ден қойылады, экономиканы көтеру мақсатында мемлекеттік-жекеменшік әріптестік механизмдері және халықаралық қаржы инс- титуттары арқылы инвестиция тартуға байланысты жұмыстар атқарылуда. Осыған орай жыл сайын ШҚО 80 мемлекетпен бірге сыртқы сауда операцияларын іске асырады. Форум қорытындысында жалпы құны 295 млрд. теңге болатын жобаларды жүзеге асыру жөнінде 45 меморандум мен келісімдерге қол қойылды. Жалпы, облыс экономикасының барлық салаларын сандық жүйеге көшіруге, соның ішінде қалалардың және аудан орталықтары көшелерін жарықтандыруды, денсаулық саласын модернизациялау, білім жүйесін цифрландыруға назар аударылып отыр. Аталған жобалар қауіпсіз орта құрып, аймақ тұрғындарының өмір сүру сапасын арттыруға бағытталған,- деп атап өтті Даниал Ахметов.
Облыс Еуропа қайта құру және даму банкімен бірлесіп 150 млрд. теңге қаржыға түрік әріптестермен бірге Өскемен қаласында 300 орынға шақталған көп салалы аурухана, Күршім ауданында Бұқтырма су қоймасы арқылы өтетін көпір құрылыстары сынды бірқатар әлеуметтік маңызға ие жобаларды жүзеге асыруды жоспарлап отыр. Айта кетейік, жобалық-сметалық құжаттар мемлекеттік сараптамадан өткізілді. Бүгінде валюталық қауіпсіздік мәселесі Үкімет деңгейінде шешілуде. Сонымен қатар мемлекеттік-жекеменшік әріптестік механизмі бойынша «Сергек» жобасының да маңызы зор. Құны 8 млрд. теңгеден асатын жоба Өскемен, Семей, Риддер, Зырян, Аягөз, Шемонайха қалаларын қамтымақ.
Тың идеяларға, жаңа инновациялар мен инвестицияларға жол ашқан форумның Шығыс Қазақстан үшін мәні зор. Облыс басшылығы инвесторларға қолдау білдіруге әр уақытта дайын екенін жеткізді.
ШҚО әкімінің баспасөз қызметі.
