Бейсенбі, 1 қараша күні республикалық «Қыс-2018» командалық штабтық оқу-жаттығулар аясында шұғыл әрекет ету жасағы құрылып, олардың қыс маусымына дайындығы мен техникаларының жай-күйі тексеріліп, тактикалық жаттығулар өткізілді. Шұғыл жасақтың жедел әрекет ету қабілеті мен техникалық мүмкіндігін қала әкімінің орынбасары Николай Ушаков та өз көзімен көріп қайтты.
Арнайы жасақтың құрамында төтенше жағдай кезінде халықты эвакуациялауға арналған әскери гарнизон, өрт сөндіру және полиция қызметкерлері, жедел медицина-лық көмек көрсету дәрігерлері, апаттық жөндеу бригадасы мен жол мамандары, «Қазақтелеком», «Теплокомуноэнерго», «Семей – Водоканал», «Шығысэнерготрейк» мекемелерінің қызметкерлері бар. Мамандардың айтуынша, мұндай оқу-жаттығулар төтенше жағдай кезінде қызметкерлерге ұйымдасып әрекет етуге септігін тигізеді.
— Бұл шара дәстүрлі түрде жыл сайын ұйымдастырылады. Семей қаласының шұғыл әрекет ету жасағы құрылып, олардың техникалармен жабдықталуы тексерілуде. Оқу-жаттығудың мақсаты — қысқы мезгілде болатын әртүрлі төтенше жағдайлардың алдын алу және жою. Шұғыл әрекет ету жасағы 48 техника мен 100 жеке құрамнан тұрады. Мекемелердің қысқы мерзімге дайындығына жақсы деп баға беруге болады,- деді Семей қаласының ТЖБ азаматтық қорғаныс бөлімінің офицері Думан Икенов.
Төтенше жағдай кезінде көмекке келетін жеке құрамның, арнайы техникалар мен қондырғылардың қыс мерзіміне дайындығын қала әкімінің орынбасары Николай Ушаков ТЖБ өкілдерімен бірге тексерді. Шұғыл әрекет етуге техникалық, жабдықтық тұрғыда қаншалықты дайын екендігіне назар аударылды.
— Бүгінде қаламызда адам өмірі үшін маңызды нысандар мен көп қабатты үйлер көп. Біз төтенше жағдай кезінде шұғыл әрекет етуге икемді және жақсы жұмыс істейтін жасақ пен техникалардың бар екеніне көз жеткізуіміз керек. Сол үшін де оқу-жаттығу жүргізілуде. Меніңше, шұғыл әрекет ету жасағы тапсырмаларды орындауға дайын. Қай уақытта болмасын жасақ техникалық және қызметтік тұрғыда кез келген жағдайға дайын болуы керек,- деді Семей қаласы әкімінің орынбасары Николай Ушаков.
Тексеруден кейін арнайы жасақтың төтенше жағдайға дайындығын пысықтау үшін тактикалық оқу-жаттығулар жүргізіледі. Мәселен, Би Боранбай көшесі бойымен Степной кентіне жақын аумақта жылу жүйесі жарылды делік. Салдарынан қаланың Нахаловка көшесінің бір бөлігі мен Степной кенті жылусыз, сусыз, жарықсыз қалды. Жағдайды қалыпқа келтіру үшін тиісті апаттық жөндеу бригадалары қамтылып, 8 техника мен жеке құрамнан 20 адам жұмылдырылды. Су арнасы мен жылу жүйесі жарылған жерлерді жөндеп, оларды қалыпқа келтіру мақсатында дәнекерлеу жұмыстары жүргізілді.
Осылайша, Семей қаласының Төтенше жағдайлар басқармасының азаматтық қорғаныс бөлімі мен шұғыл жасақ төтенше жағдайға дайындықтары жақсы екенін байқатты.
Құралай ҚАЙЫРЖАНҚЫЗЫ, «Семей таңы»
