Өткен аптада қалалық әкімдікте тарифтік сметалар мен инвестициялық бағдарламалардың орындалуы бойынша қоғамдық тыңдау өтті. Жиынға Табиғи монополияларды реттеу және бәсекелестікті қорғау комитетінің ШҚО бойынша департаментінің басшысы Қайрат Оразбаев, қала әкімінің орынбасары Николай Ушаков, «Семей — Водоканал» МКК директоры Еркен Сағындықов, «Теплокоммуноэнерго» МКК басшысының орынбасары Жанғазы Алипбаев және қала тұрғындары мен БАҚ өкілдері қатысты.
Қала тұрғындары үш жыл бойы коммуналдық шығындардың негізделмеген тарифі үшін 29 млрд. теңге төлеп келген. Естеріңізге сала кетейік, осы мәселеге байланысты қараша айының басында Елбасы Ақордада жиын өткізіп, ҚР Ұлттық экономика министрлігінің Табиғи монополияларды реттеу мен бәсекелестікті қорғау жөніндегі комитеті департаментінің жұмысын сынға алды. Әдетте, жабық есік жағдайында өтетін Қауіпсіздік кеңесінің отырысы сол кезде бұқаралық ақпарат құралдарында бастан-аяқ ашық көрсетілген болатын. Себебі қаралған мәселе мемлекеттік құпия емес, халықтың қалтасын қаққан қаражатқа қатысты еді. Иә, еліміздің тұрғындары үш жыл бойы коммуналдық қызметтерге 2 есе артық төлеп келген. Ашып айтсақ, жылу мен судың бағасы 2009 жылдан бастап қымбаттаған болатын. Мемлекет тозығы жеткен құбырлар мен желілерді жөндеу үшін осындай қадамға барды. Бірақ бағдарлама 2015 жылы аяқталу керек еді. Алайда тариф құны төмендетілмей, сол күйінше қалған. Бұл мәселені анықтауға Президент Бас прокуратураға тапсырма берген. Тексерістің қорытындысы көңіл көншітпейді. Тариф құнын қымбаттатудың нәтижесінде тозығы жеткен желілер мен газ құбырларының саны 80 пайыздан 53 пайызға дейін азайды. Десе де бірқатар былықтардың беті ашылды. Бұл ретте Елбасы қаржыны жымқырған мекемелерді жауапқа тартып, әрбір өңірде тарифтерді төмендету бойынша тиісті шараларды қолдануға тапсырма берген болатын.
Міне, осы тапсырмаға орай, Шығыс Қазақстан облысы бойынша коммуналдық мекемелер өкілдерінің қатысуымен тарифтік смета бойынша қоғамдық тыңдаулар өткізіле бас-тады. Бұған дейін осындай жиындар Өскемен, Зырян, Риддер қалаларында өткізілді.
Семей шаһарындағы жиын барысында алғашқы болып сөз алған «Семей — Водоканал» ММК директоры Еркен Сағындықов соңғы үш жылда атқарылған жұмыстар бойынша есеп берді. Кәсіпорын басшысының айтуынша, мекеме электр жарығын едәуір үнемдеуге қол жеткізген. Сондай-ақ тұрғындардың көпшілігі есептеу құралдарын орнатқандықтан, су тұтыну мөлшері төмендеген. Яғни, халық суды үндемеп жұмсай бастаған. Бүгінде қаладағы абоненттердің 91 пайызы суды үнемдеуге мүмкіндік беретін есептеу құралдарымен қамтылған.
Ал қаланы жылумен қамту мәселесіне байланысты айтар болсақ, биыл «Теплокоммуноэнерго» мекемесіне Табиғи монополияларды реттеу және бәсекелестікті қорғау комитетінің облыстық департаменті айыппұл салды. Кәсіпорын өз турбинасын іске қосу арқылы 96 млн. теңгенің электр қуатын үнемдеген. Әйтсе де бұл туралы департаментке ескертпеген. Құжат бойынша, қаражат электр қуатын сатып алуға жұмсалуы тиіс болатын. Прокуратура заң бұзушылықты анықтап, мекемені жылу ақысын 3 пайызға төмендету арқылы тұрғындармен қайта есеп айырысуға міндеттеді. Негізі, бұл құқық бұзушылықтар сметалық есептеулердің дұрыс жасалмауынан туындаған. Енді өтемдік тариф қаламызда бір жылға дейін қолданылатын болады.
Қуандық НӘДІРБЕКҰЛЫ, «Семей таңы»
