Елбасымыз Н.Ә.Назарбаевтың «Болашаққа бағдар: рухани жаңғыру» бағдарламасы аясындағы «Қазақстандағы 100 жаңа есімі» жобасына ШҚО бойынша 11 адам енген болатын. Солардың бірі – жерлесіміз, ақын, «Серпер» жастар сыйлығының иегері, докторант, Мәдениет саласының үздігі Ержан Жұмабек.
Сейсенбі, 20 қараша күні Семей қаласы Шәкәрім университетінде «Мәңгілік ел» кафедрасының ұйымдастыруымен «Бойымда асау жастық жалыны бар» атты Ержан Жұмабектің өмірі мен шығармашылығына арналған кездесу кеші өтті. Іс-шараға филология ғылымдарының докторы, профессор Арап Еспенбетов, математика ғылымдарының докторы, ментор Ерғали Есенжолов, университет ұстаздары мен студенттері қатысты.
Кездесудің шымылдығын Ержан Жұмабектің ұстазы, ментор Арап Еспенбетов құттықтау сөзімен ашып берді.
— Аса қадірменді қауым, бүгін бір үлкен кездесудің куәсі болғалы отырмыз. Кешегі бала бүркіт, бүгінде қос қанатын кеңге жайып, алысқа самғап, биік белестерді бағындарған дарынды азамат Ержан Жұмабек «Қазақстанның 100 жаңа есімі» жобасының жеңімпазы болып отыр. Мемлекет басшысы Нұрсұлтан Назарбаев «100 жаңа есім» жобасы жайында: «Жастар өмірге шынайы көзбен қарап, өз тағдырларына өздері иелік ете алатын азаматтар болуы үшін оларға үлгі ұсынуымыз керек»,- деген болатын. Міне, біздің Ержанымыз — жастарға нағыз үлгі боларлықтай, сегіз қырлы, бір сырлы жігіт. Шәкіртім, сенің алар биігің мен асар асуың әлі алда, осылай жарқырап көрініп, еліңе қызмет ете бер,- деп жүрекжарды лебізін білдірді Арап Сіләмұлы.
Басқосуды «Дарын» сыйлығының иегері, ақын Мерей Қарт тізгіндеп отырды.
Шара барысында Д.Бабатайұлы атындағы ақындар мектебінің шәкірттері Ержан Жұмабектің лирикалық өлеңдерін оқып, поэзиялық көңіл-күй сыйлады.
Қазақстанның заманауи келбетін қалыптастыруға үлес қосып жүрген, елі үшін еңбек етуді мақсат тұтқан айтыскер ақын, дарынды жас, тоқсан өнерді бойына тоғыстыра білген Ержанмен кездесу кеші студенттерге ерекше әсер қалдырды.
Шәкәрім университетінің студенті Ерасыл Айтбергенов кештен алған әсерімен бөлісті.
— Білімнің қара шаңырағы Шәкәрім университетіндегі өзіміздің жерлесіміз Ержан Жұмабекпен кездесу кеші маған ерекше әсер етті. Көкейімізде жүрген сауалдарымызға Ержан ағамыз толыққанды жауап берді. Ағамыздың өмір жолы – бізге үлгі – өнеге, бүгінгі берген ақыл-кеңестері жастарды жігерлендіріп, биік мақсаттарға жетелейтіні сөзсіз. Алдағы уақытта осы ағамыз сияқты мен де «Қазақстанның 100 жаңа есімінің» жеңімпазы болсам деймін. Ол үшін, әрине, «Маңдайы терлемегеннің қазаны қайнамайды» демекші, көп еңбек етуіміз қажет,- дейді Ерасыл.
Бүгінгі таңда Ержан Жұмабектің сөзіне жазылған әндерді қазақ эстрадасының жұлдыздары Марат Омаров, Нұрлан Албан, Серікбол Сайлаубек сынды және Зивара, Фарида Жолдасова, Ерасыл Абдуалиев, Ержұма Маралбек, Ертуған Құрмашев, «Заман», «Сармат» топтарының әншілері орындап жүр.
Кездесу соңында Арап Сіләмұлы шәкірті Ержанға Құрмет грамотасын табыстап, еңбегіне жеміс тіледі.
Қуандық НӘДІРБЕКҰЛЫ, «Семей таңы»
