Қала әкімі Ермак Сәлімов жұма, 23 қараша күні «SEMEI» телеарнасында тікелей эфирде өткен «Әкімнің сағаты» бағдарламасында қонақта болып, семейліктердің сұрақтарына жауап берді. Қала тұрғындары жол жөндеу, қала көшелерін жарықтандыру, қоғамдық көлік, жалақы мәселелеріне қызығушылық танытты. Сауалдар телефон арқылы және телеканал редакциясының электрондық поштасына жолданып отырды.
Тікелей эфирдің басында шаһар басшысы Премьер-министр Бақытжан Сағынтаевтың Семейге жасаған жұмыс сапары барысын баяндап, Министрлер кабинетінің басшысы жергілікті атқарушы органдардың қызметін жоғары бағалағанын атап өтті.
— Мемлекет басшысы Жолдауында қазақстан-дықтардың әл-ауқатын, табыс пен өмір сапасын арттыру туралы өте айқын міндет қойды. Біздің мақсат – Елбасы қойған міндеттерді орындап, халықтың тұрмысын жақсарту. Өздеріңіз білетіндей, Даниал Ахметовтің тапсырмасы бойынша 2017-2019 жылдарға арналған қаланы дамыту жоспарына сәйкес жұмыс жасаудамыз. Бүгінгі таңда Семейдің әлеуметтік-экономикалық дамуында оң динамика байқалады,- деді эфир кезінде қала басшысы.
Одан кейін шаһар басшысы өнеркәсіп өнімдері, тау-кен өнеркәсібі, өңдеу өнеркәсібі, ауыл шаруашылығы, құрылыс, бөлшек тауар айналымы, инвестиция, бюджет салаларының негізгі көрсеткіштеріне тоқталды.
— Елбасы Жолдауында бизнес өкілдеріне жаңа жұмыс орындарын құрып, тұрғындар жалақысын арттыру жайлы ұсыныс айтты. Қазіргі таңда қаладағы ірі және шағын кәсіпорындардағы жұмысшылардың орташа айлық жалақысы 8,2%-ға өсіп, 119,7 мың теңгені құрады. Биыл шағын және орта кәсіпкерліктің өнім көлемі жиырма пайызға өсті,- деді Е.Сәлімов.
Сондай-ақ қала әкімі «Өндіріс» индустриялық аумағында «AgroPortal» ЖШС ирандық компанияның қатысуымен жүзеге асып жатқан ет комбинатының құрылысы шетелден 6,7 млрд. теңге инвестиция тартып, 250 жұмыс орнын құруға мүмкіндік беретінін жеткізді.
— Халықтың жағдайын жақсарту үшін әлеуметтік сектор мен инфрақұрылымға баса назар аудару қажет. Бұл бағытта Ұшақтар және Бобровка шағын аудандарында 1800 орынға арналған екі мектеп пайдалануға берілді, ендігі кезекте Степной және Восточный кенттерінен 1500 орындық мектеп салу жоспарда бар. «Рухани жаңғыру» бағдарламасы аясында қала мектептерінде 30 «Мәңгілік ел», 52 робототехника кабинеттері ашылды. Шаһарда 55 балабақша жұмыс істесе, оның отыз жетісінде мемлекеттік тапсырыс орындалады. Осы жылы Қарағайлы шағын ауданында 320 орындық балабақша салынды және Ұшақтар шағын ауданында 280 орындық балабақшаның құрылысы аяқталуға жақын. Жолдауда бұқаралық спортты дамытуға және дене шынықтыруға ерекше мән берілген. Соңғы жылдары спортпен және дене шынықтырумен жүйелі айналысатын тұрғындардың саны 30 %-ға жетті. Биыл Семейде тоғыз «Workout» (воркаут) спорт алаңдары ашылды,- деді шаһар басшысы.
Семейліктердің тұрғын үй мәселесіне қатысты қойған сауалдарына орай қала басшысы:
— «Нұрлы жер» бағдарламасы аясында тұрғын үйлер салынуда. Қазіргі таңда Қарағайлы ауданында барлық қажетті инженерлік-коммуникациялық желілер тартылды. Осы жылдың соңына дейін аталған ауданда он алты үй пайдалануға беріліп, таяуда тағы он сегіз үйдің құрылысы басталатын болады. «Нұрлы жер» бағдарламасы аясында жеке тұрғын үй салу мақсатында Семейде он шағын аудан құру жоспарда бар. Бірінші кезеңде Ақсай ауданын электр желілерімен, сумен қамтамасыз ету жүргізілуде. Одан кейін Комсомол және Ұшақтар аудандарын су және электрмен жабдықтау жұмыстары жоспарланған. «7-20-25» бағдарламасын жүзеге асыру басталып, алғашқы несиелер берілуде,- деді қала басшысы.
Тікелей эфир барысында қаланың инфрақұрылымын дамыту үшін Европалық қайта құру және даму Банкімен жалпы сомасы 12,9 млрд. теңгеге келісімшарт жасалғаны және мұның барлығы шаһарды жылумен, сумен қамтамасыз етуге, көшелерді жарықтандыруға жұмсалатыны айтылды. Сондай-ақ Ермак Бидахметұлы биыл қала жолдарын жөндеуге 2,1 млрд. теңге бөлінгенін және бұл қала жолдарының 76 пайызының жағдайын жақсартуға мүмкіндік бергенін айтып өтті.
— Атқарылып жатқан жұмыс-тар аз емес. Семей қаласы әуежайының жөндеу жұмыстары аяқталды. «Абай-Арена» мәдени-спорттық кешені салынуда, сонымен қоса жалпы сомасы 611 млн. теңгеге «Менің аулам» жобасы іске асырылуда. Алдағы уақытта Семей және Өскемен қалаларының қоғамдық көліктері жаңартылып, электрондық билет жүйесіне көшу көзделген.
Күні кеше ғана Елбасы Нұрсұлтан Әбішұлы Назарбаев «Ұлы даланың жеті қыры» атты мақаласын жариялады. Мақалада Елбасы әлем тарихындағы Ұлы даланың рөлін айқындап, біздің ұлттық тарихқа жаңа көзқарасты қалыптастырды. «Ұлы даланың жеті қыры» — «Рухани жаңғыру» бағдарламасының лайықты жалғасы. Сондықтан барлығымыз Елбасының саясатын бірге жүзеге асыруымыз қажет, — деді Ермак Бидахметұлы.
Бір сағат жиырма минутқа созылған тікелей эфир барысында Ермак Бидахметұлы қала тұрғындарының сауалдарына жан-жақты және толық жауап қайырды. Семейліктер халықпен кері байланысқа шыққан шаһар басшысына алғыс айтып, атқарып жатқан істеріне жақсы баға берді.
«СТ-ақпарат»{jcomments off}
