Жеке тұрғын үй құрылысы үшін тегін 10 сотық жер алуға әр қазақстандықтың құқы бар.
27 қараша күні Семейге ҚР Мемлекеттік қызмет істері және Сыбайлас жемқорлыққа қарсы іс-қимыл агенттігінің арнайы мониторинг тобының мүшесі, жер мәселелері бойынша заңгер Бақытжан Базарбек келіп, тұрғындармен кездесу өткізді.
Заңгер Бақытжан Базарбек жер мәселелері бойынша еліміздің әр өңірінде халықпен жүздесіп, тегін заңгерлік кеңестер беріп, семинарлар өткізіп келеді. 10 қазанда басталған семинар осыған дейін Ақтау, Қызылорда, Түркістан,Тараз, Шымкент, Талдықорған, Атырау, Орал, Ақтөбе және Павлодар қалаларында ұйымдастырылған.
— Семинарларға 1200-ге жуық азамат қатысып, 700-ден астам азамат көкейлеріндегі сауалдарына жауап алды. 100-ден астам сұрақ аймақтық департаменттер қарауында.
Семинардың қорытындысында жер мәселелері бойынша мемлекеттік органдарға тексерістер жүргізіліп, біраз азаматтардың құқықтары қорғалды. Сыбайлас жемқорлыққа қарсы іс-қимыл агенттігі де іске араласып, жерге байланысты туындаған мәселелер шешілді.Біздің мақсатымыз – сіздерге кәсіби құқықтық кеңес көрсету. Біз ешқандай мемлекеттік органға бағынбаймыз, сыбайлас жемқорлыққа қарсы іс-қимыл агенттігімен тікелей жұмыс жасаймыз, — деді Б.Базарбек.
Оның айтуынша, статистика бойынша Қазақстанда 1 млн. 200 мың адам жеке тұрғын үй құрылысы үшін 10 сотық жер алуға кезекте тұр. Мәселен, Алматы қаласында 160 мың, Шымкентте 167 мың, Астанада 107 мың, ал Семейде 23 мыңнан астам адам кезегін күтуде. Сондай-ақ ол жеке тұрғын үй құрылысы үшін 10 сотық жер алуға 18 жастан асқан әр қазақстандықтың құқы бар екенін тұрғындар есіне тағы бір мәрте салды.
— 2003 жылы қабылданған Жер кодексіне сәйкес, жеке тұрғын үй құрылысы үшін тегін 10 сотық жер алуға 18 жастан асқан әр қазақстандықтың құқы бар. Бұрындары айдалануға беру актісі берілген соң, жер телімі бірден сол азаматтың меншігіне берілетін. Бірақ мемлекеттік актіні алған соң азамттардың басым көпшілігі жерді өзге біреуге сатып жібереді. Әр өңірде 100 мыңнан астам осындай оқиғалар тіркелді. Сондықтан 2009 жылы Жер кодексіне өзгерістер енгізілді. Қазір жер үш жылға (2+1) жалға беріледі. Және сол үш жыл ішінде жалға берілген аумаққа тұрғын үй салынуы керек. Осыдан кейін ғана жер азаматтың атына өтеді, — деді Б.Базарбек.
Сондай-ақ заңгер Жер кодексіне сәйкес қосалқы шаруашылық үшін — 0,15 гектар суармалы, 0, 25 гектар суармалы емес және саяжай құрылысы үшін 0,12 гектар жер алуға мүмкіндік бар екенін айтты. Бірақ жеке тұрғын үй құрылысы үшін 10 сотық жер алу мүмкіндігі әр азаматқа тек бір рет беріледі.
— Бір азаматтың екі рет тегін жер алуына рұқсат жоқ. Бірақ 18 жасқа толған немесе 18 жастан асқан әрбір отбасы мүшесі 10 сотық жер алуға құқылы. Сондықтан мемлекеттік органдар бір отбасына бір жер телімі жетеді депген талап қойса, прокуратураға шағым түсіруге әбден болады. Егер келісімшарт уақыты жақындап қалса, бірақ тұрғын үй құрылысы толық аяқталмаса, Жер кодексінің 37-бабын пайдалана аласыздар. Ол бойынша келісімшарт уақыты аяқталмай тұрып 2-3 ай бұрын, келісімшарт уақытын созу туралы өтініш беру керек. Бірақ сіз шынымен жұмыс істеп, құрылыстың бел ортасына келгеніңізді көрсетуіңіз керек. Ал егер жер үш жыл ішінде игерілмей бос бұрса, мемлекетке қайтарылады, — дейді заңгер.
Жер кодексіне сәйкес жер телімі орталық электр желісімен және сумен жабдықталған ауданнан берілуі керек. Жер алуға өтініш беру үшін жеке куәліктің көшірмесі мен азаматтың атына тіркелген жылжымайтын мүліктер туралы анықтама жеткілікті.
— Кейбір шенеуніктер азамттардан АХАЖ бөлімінен анықтама сұрайды. Бұл заңға қайшы. Өтініш беру үшін жеке куәліктің көшірмесі мен азаматтың атына тіркелген жылжымайтын мүліктер туралы анықтама жеткілікті. Егер сіздерден тағы басқа құжаттар сұраса, мұның заңға қайшы екенін білулеріңіз керек. Азаматтардың алдымен Жер кодексін оқып, танысып алғандары дұрыс дейді, — Бақытжан Жұмабекұлы.
Семинар барысында тұрғындар мен қызметкерлер заңгерге сұрақтарын қойып, кеңес алды.
Жадыра ТӨЛЕГЕНҚЫЗЫ, {jcomments off}«Семей таңы»
