Сәрсенбі, 28 қараша күні «Шығыс Қазақстан Аймақтық Энергетикалық компания» АҚ-ның бастамасымен Семей қаласында Қазақстан Республикасының Тұңғыш Президенті күніне және Семей электр желісінің 100 жылдық мерейтойына орай жаңа оқу сыныбы ашылды.
Жаңа оқу сыныбының қызыл лентасын қию құрметі энергетика саласында елеулі қызмет атқарған, Қазақстан Республикасының еңбек сіңірген энергетигі Ғабиден Мусаиновқа берілді. Ардагер энергетик жүрекжарды лебізін білдірді.
— Құрметті әріптестер, құрметті менің шәкірттерім! Бүгін үлкен іс-шараның куәсі болып отырмыз. Осыдан 100 жыл бұрын қызметін бастаған Семей электр желісінің мерейтойы құтты болсын!Қаламызды жарықпен қамтамсыз етіп отырған сіздердің еңбектеріңіз жемісті, қызметтеріңіз табысты, мәртебелеріңіз әрқашан жоғары болсын. Барлықтарыңызды алдағы Тұңғыш Президент күнімен және сіздердің төл мерекелеріңіз Энергетиктер мерекесімен құттықтаймын, — деді Ғабиден Мусаинов.
Айта кетейік, «ШҚ АЭҚ» АҚ – Семей қаласының 92 мыңнан астам тұрғынын жарықпен қамтып отырған, сондай-ақ өндірістік кәсіпорындар мен мемлекеттік мекемелерге және ауыл шаруашылығы қожалықтарына электр қуатын тарататын республиканың шығысындағы ең ірі энергетикалық кәсіпорын. Бұл компания биылғы жылды табысты аяқтап отыр. Мекеме басшысы Бауыржан Смағұлов 2018 жылдың кәсіпорын үшін жемісті болғанын жеткізді.
— Бүгін Семей электр желісінің 100 жылдық мерейтойында Тұңғыш Президент күніне орайластырып оқу сыныбын ашып отырмыз. Мекеме үшін биылғы жыл табысты болды.Оқу сыныбын ашудағы негізгі мақсатымыз — жаңадан келген мамандардың білімі мен біліктілігін арттыру. Бұл кабинетте энергетика саласында 30 жылдан артық қызмет еткен нағыз өз ісінің шеберлері дәріс оқып, тәжірибе жұмыстарын көрсетеді. Қазіргі таңда белгіленген жоспар бойынша, яғни электр беру орталықтары мен қосалқы стансалардың барлығы толық жөндеуден өткізілді. Қысқа сақадай-сай отырмыз. Дегенмен алда жоспар көп, атқарылар жұмыстар да ауқымды. Сондықтан да тынымсыз еңбек етуіміз керек. Энергетика саласының мамандарына зор денсаулық және алдағы жоспарларды іске асыруда толағай табыстар тілеймін,– деді Бауыржан Рамазанұлы.
Бүгінде мамандандырылған сыныпта сапалы оқу процесін жүзеге асыру үшін арнайы жабдықтар, көрнекі құралдар және қажетті құрылғылар мен алғашқы көмек көрсетуге арналған тренажер, компьютерлер бар. Жас кадрларды тәрбиелеудегі мұндай тәсіл қызметкерлерге өзінің кәсіби деңгейін арттыруға мүмкіндік береді. Қызметкерлердің біліктілігін жоғарылатудың арқасында Семей қаласында апатты жағдайларда жарық сөндіру саны төмендеуде, ал қала жұртшылығы энергиямен тұрақты қамтамасыз етіліп отыр. Соңғы 5-6 жылдың нәтижесі бойынша электр энергиясының шығыны 31% — дан 11% — ға дейін төмендеді.
Естеріңізге сала кетейік, Семей электр желісінің қызметкерлері 2013 жылы Астана қаласында «Кәсіби шеберлік» атты энергетиктер арасында өткен республикалық жарыста кәсіпорынның намысын қорғап, жүлделі 4-ші орынға ие болып, Қазақстан Республикасының энергетикалық кәсіпорындары арасында өздерінің нағыз тәжірибелі мамандар екенін дәлелдеп,Семей командасы «ҚР үздік шебері» номинациясын жеңіп алды. Сонымен қатар 2014 жылы Семей командасы Шығыс Қазақстан облысында (Таврия аудандық электр желісінде) өткен республикалық жарыста тағы да бас жүлде — темір тұлпарға ие болып, «ҚР үздік шебері» номинациясын иеленді.
Сондай-ақ компания электр қуатын коммерциялық есептеудің автоматтандырылған жүйесін енгізуге үлкен күш салып отыр. Жоба электр қуатын есептеудің нақтылығын арттырып, шығындарды төмендетуге мүмкіндік береді. Ең бастысы, бұл компания қызметкерінің электр қуатын тұтыну бойынша нақты мәлімет алуын қамтамасыз етеді.
Қалай десек те, бүгінгі таңда әлемді жарықсыз елестету мүмкін емес. Энергетиктер жұмысының маңыздылығына баға жетпейді, олардың еңбектері арқасында тұрғындардың үйлері жайлы да жарық, ұйымдар мен мекемелер қалыпты қызмет етіп келеді. Сондықтан елімізге жарық беріп отырған энергетиктердің еңбегі ерекше екендігін атап өтуіміз керек.
Біз де қаламызды жарықпен қамтып отырған Семей электр желісінің ұжымын 100 жылдық мерейтойымен құттықтап, жаңа бастамаларына сәттілік тіледік!
Қуандық НӘДІРБЕКҰЛЫ, {jcomments off}«Семей таңы»
