26-30 қараша күндері Семей қаласының ядролық медицина және онкология орталығында Польшаның Варшава қаласынан келген радиотерапевт Павел Банаткевич бастаған радиациялық онкологтер мен медициналық физиктер халықаралық шеберлік сыныбын өткізді. Шараның мақсаты — еліміздегі онколог мамандарға өңеш, өкпе және сүт безі қатерлі ісігін емдеуде қолданылатын брахитерапия әдісін үйрету.
Шетелдік онкологтер шеберлік сыныбын бастамас бұрын дөңгелек үстел өткізді. Онда қалалық ядролық медицина және онкология орталығының ғылыми-техникалық әлеуеті, онкологиялық ауруларды емдеудегі отандық медицинаның мүмкіндіктері, маңызды клиникалық зерттеулер, тың жаңалықтар, өңірдегі қатерлі ісікке шалдыққандарды емдеу деңгейі туралы сөз қозғалып, өзекті мәселелер талқыланды.
Дәрігер мамандардың айтуынша, Шығыс Қазақстан облысында нәзік жандылар арасында сүт безі, тері, ішек, жатыр мойны қатерлі ісігі аурулары белең алса, ер азаматтар өкпе, асқазан, простата безінің және тік ішектің обыры дертіне жиі шалдығады екен. Өкінішке қарай, статистикаға сүйенсек, облысымыз қатерлі ісік ауруларымен ауыратындардың саны бойынша республикада алдыңғы қатарда тұр. Бір қуантарлығы, кейінгі кезде онкологиялық аурулардың арасында өлім-жітімнің төмендеуі байқалады. Бұл қалалық онколог дәрігерлердің тәжірибелілігі, денсаулық сақтау саласына арналған мемлекеттік бағдарламалар мен шетелдік серіктестікті қолдаудың арқасында мүмкін болып отыр. Өткен жылы аймақ басшысы Д.Ахметовтің қолдауымен онкологтердің біліктілігін арттыру мақсатында әлемнің жетекші мемлекеттерінде білім алып, тәжірибе алмасуға қаражат бөлінген болатын. Биылғы жылы Семей ядролық медицина және онкология орталығының 11 маманы Жапония мен Польша мемлекеттерінде білімін жетілдірді.
Семейге келген польшалық онкологтер тобы қаламыздағы дәрігерлерге жоғары дозадағы брахитерапияны қолдану әдісін үйретті. Қазіргі уақытта Қазақстанда гинекологиялық аурулар мен тік ішектің қуық ішілік аурына шалдыққан науқастарға емдеудің брахитерапия әдісі қолданылады. Бұл емдеудің ерекшелігі — сау тіндерге, ағзаларға әсер етпей, ісікті жоғары мөлшердегі сәуле арқылы жояды. Мұндай әдістерді қолдану радиация әсерін төмендетіп, емдеуді жылдамдатуға мүмкіндік береді дейді польшалық онкологтер.
— Емдеудің бұл әдісін дәрігерлердің көбі қолдана бермейді. Өйткені бұл әдіс дәрігердің белгілі бір мануалдық дағдысы болуын талап етеді. Жатыр мойны обырын немесе простата обырын емдегенде, біз брахитерапияны радикалды емдеу ретінде пайдаланамыз. Ал өкпенің қатерлі ісігін емдеу кезінде бұл әдіс паллиативтік ем ретінде қолданылады. Брахитерапия әдісінің көптеген ерекшеліктері бар. Мысалы, емдеу кезінде науқастың қатерлі дертке шалдыққан мүшесін сақтап қалуға мүмкіндік бар. Яғни, радиацияның дозасы ем алушының басқа мүшелерінің зақымдалуына жол бермей, қатерлі ісікке тікелей әсер етеді,- дейді Павел Банаткевич. — Біздің елде онкологиялық науқастардың ішінде толық емдеуден өтіп, жазылып кеткеннен кейін де қайта қайталап ауыратындар көптеп кездеседі. Мұндай жағдайларда хирургтер науқастың денесіндегі радиологиялық емдеуден өткен ағзасына операциялар жүргізе алмайды. Сондықтан бұл пациенттер көп жағдайда дұрыс ем алмайды. Тек соңғы жылдары біз брахитерапия әдісін қолдана бастадық, өйткені мұндай емдеудің нәтижелері өте жақсы, — деді польшалық онколог.
Павел Банаткевичтің айтуынша, брахитерапияның жоғары дозасынан кейін науқастың айығып кету мүміндігі 15 пайыздан 20 пайызға дейін артады екен. Ал басқа да әдістермен бірге қолданғанда пациенттің аурудан айығу ықтималдылығы 60-70%-ға дейін өседі. Әрине, бұл онкологиялық аурудың дәрежесі мен науқастың денсаулық жағдайына, дәрігердің біліктілік деңгейіне де байланысты.
Халықаралық шеберлік сыныптары барысында Польшадан келген мамандар бірнеше тәжірбиелік ем шараларын жүргізді.
Құралай ҚАЙЫРЖАНҚЫЗЫ, {jcomments off}«Семей таңы»
