12 желтоқсан, апта сәрсенбісінде Абай театрында «Қаламқас» халықтық ән-би ансамблінің кезекті шығармашылық концерті болып өтті. Өнер ұжымының әуенді сазын сағынған семейліктер бұл жолы да театрға молынан жиналды. Концертті тамашалауға Семей қаласының әкімі Ермак Сәлімов, Абай ауданының әкімі Жарқынбек Байсабыров, «Қазақстан барысы» және екі мәрте «Әлем барысының» жеңімпазы Айбек Нұғымаров арнайы келді.
Жарты ғасырға жуық Абай даласы мен қазақ елін әнге бөлеп келе жатқан «Қаламқас» халықтық ән-би ансамблінің шығыс жұртшылығы үшін орны ерекше. Еуропада, Венгрия, Түркия, Қытай мемлекеттерінде қазақ өнерін паш еткен «Қаламқас» ансамблі өткен жылы 45 жылдық мерейтойын атап өтті. «Абай елі – руханият меккесі» атты ансамбльдің бұл жолғы шығармашылық кеші ҚР Тәуелсіздік күніне орайластырылыпты.
Кештің шымылдығын «Шыңғыстау» ұлт аспаптар оркестрі ашты. Одан әрі ансамбльдің көркемдік жетекшісі Нұрбек Өмірбеков, Қазақстанның еңбек сіңірген қайраткері, Абай ауданының Құрметті азаматы Бақыт Шағатаева, Халықаралық «Шабыт» фестивалінің лау- реаты, ансамбльдің дәстүрлі әншісі Қайрат Қабышев, ҚР мәдениет саласының үздігі Еркін Жолжігіт, Жанат Хайсина және Жайнагүл Тұрсынбаева, Таңнұр Жақсыбеков сынды ансамбль мүшелері әуезді әндерін шырқады. Сондай-ақ жерлес күйші, ҚР мәдениет саласының үздігі Айбек Бекбосынов «Елбасы толғауы» және «Айбарыс» атты туындыларын тарту етті.
— Батырларды ұлықтау қазақтың дәстүрінде бар. Мәселен, Махамбет өзі батыр бола тұра, Жұмыр, Қылыш деген екі ағайынды батырдың ерлігіне тәнті болып, «Жұмыр — Қылыш» деген күйін өмірге әкелген. Мен де сол дәстүрді жалғастырып, жерлесіміз Айбек Нұғымаров 2013 жылы «Қазақстан барысы» атанғанда, «Айбарыс» атты күй шығардым. Айбек осымен екі мәрте «Әлем барысы» атанып, Абай елінің, Семейдің ғана емес, бүкіл Қазақстанның атын әлемге танытып жүр,- деді Айбек Бекбосынов кеш барысында.
Концерт соңында Семей қаласының әкімі Ермак Сәлімов жұртшылықты құттықтап, «Қаламқас» ансамбліне шығармашылық табыс тіледі.
— 45 жылдық тарихы бар «Қаламқас» ансамблі — Абай елінің ғана емес, Қазақстанның мақтанышы. Абай ауданы мен Семей қаласы арасындағы мәдени байланыс нығая берсін. Абай елі – руханияттың ордасы, киелі мекен. Ұлттық өнерді насихаттап жүргендеріңіз үшін алғыс айтамыз. Абай ауданы мен Семей қаласы гүлдене берсін. Еліміз аман, жұртымыз тыныш болсын!- деді Е.Сәлімов.
— Семей қаласы мен Абай елін бөле-жаруға болмайды. Ұлы Абай Семей қаласында алғаш медресенің есігін ашып, білім нәрін алды. Ойшыл Шәкәрім Құдайбердіұлы мен ғұлама Мұхтар Әуезовтің де өмірі мен шығармашылығы Семей қаласымен тығыз байланыста болғанын білесіздер. Семей ядролық полигонының зардабын да Семей мен Абай халқы бірге бастан кешірді. Абай елін Семей халқымен көп жағдайлар байланыстырады. Өнерімізді сіздермен бөлісейік деп бүгін арнайы келіп отырмыз. Баршаңызды алда келе жатқан Тәуелсіздік мерекесімен құттықтаймын! Еліміздің еңсесі биік болсын!- деген Жарқынбек Борашұлы қала әкімі Ермак Сәлімовке естелік сыйлық тапсырды.
Жадыра ТӨЛЕГЕНҚЫЗЫ, {jcomments off}«Семей таңы»
