Сейсенбі, 11 желтоқсан күні Семей қаласының Ядролық медицина және онкология орталығына Асқар Жакулин атындағы қайырымдылық қоры қатерлі ісікке шалдыққан науқастарға ем жүргізуде заманауи брахитерапия әдісін қолдануға арналған провайдер үстелін табыс етті. Онкологтердің айтуынша, аталмыш медициналық құрылғы сәулелі ем барысында өзге тіндерді зақымдамай, тікелей ісікті жоюға мүмкіндік береді екен.
Салтанатты табыстау рәсіміне Қазақстанның мәдениет қайраткері Алмас Ахметбекұлы, Асқар Жакулин атындағы қайырымдылық қорының директоры Гүлнар Сейдолла, қор демеушісі Дәурен Халмет пен қызметкерлері Мархабат Шакреева, Назым Мұхамадиева қатысты.
Асқар Жакулин атындағы қайырымдылық қоры қатерлі ісікке шалдыққан науқастарға қолдау көрсету мақсатында 2016 жылы құрылған. Осы аз уақыттың ішінде қор көптеген игілікті істер атқарып үлгерді. Қорды қатерлі ісік дертінен көз жұмған белгілі кәсіпкер, парасатты азамат Асқар Жакулиннің жары Жайна Жакулина құрған болатын. Міне, сол уақыттан бері қор көптеген науқас балалардың ем алуына жағдай жасап, бірнеше ауруханалардың жаңа медициналық құрылғылармен жабдықталуына септігін тигізді.
2017 жылы «Жаңарту» бағдарламасын іске асыру аясында қайырымдылық қоры Семей қаласының Ядролық медицина және онкология орталығына қарқынды терапия және реанимация бөліміне арналған құны 8 млн. теңге тұратын төсектік мониторларды сыйға тартқан болатын.
Бүгін Асқар Жакулин атындағы қайырымдылық қорының директоры Гүлнар Сейдолла Ядролық медицина және онкология орталығына құны 25 млн. теңгеден асатын провайдер үстелін салтанатты түрде сыйға тартты. Бұл қатерлі ісікпен ауыратын науқастарға заманауи сәуле емі — брахитерапия әдісін дұрыс жүргізуге мүмкіндік береді.
— Қазіргі таңда қатерлі ісікке шалдыққан науқастар қатары көп. Жүргізілген зерттеу нәтижелерінде, мәселен нәзік жандылардың арасында жатыр мойны обырына шалдығатындардың көбі 30-39 жас аралығындағылар. Обырды емдейтін басты емнің бірі — радиация беру. Оның сырттан және іштен беретін екі түрі бар. Іштен берілетін радиация брахитапия әдісі деп аталады. Заманауи брахитерапия әдісін қолдануда провайдер үстелі өте қажетті құрылғы. Неге? Сәулемен емдеу кезінде науқас орнынан 1 миллиметр солға да, 1 милиметр оңға да қозғалмауы керек. Егер науқас радиация беру кезінде қозғалатын болса, басқа сау ағзаға зиян келтіреді. Провайдер үстелі емнің дұрыс жүргізілуіне көмектесетін таптырмас құрал, — деді Семей қаласының мемлекеттік медицина университетінің клиникалық және радиастанциялық онкология кафедрасының меңгерушісі, профессор Тасболат Адылханов.
— Семей қаласының Ядролық мединицина және онкология орталығының директоры Марат Сандыбав мырзаның атынан сәулелі ем кезінде қолданылатын провайдер үстелі қажеттігі туралы ұсыныс түскен болатын. Қайырымдылық қоры қаражат жинап, бүгін табыстап отырмыз. Біздің осы ізгі ниетімізді енді іске асырушы, пайдасын тигізуші ақ халатты абзал жандар, сіздерсіздер.Халықтың денсаулығын сақтап, жақсартуда дәрігерлердің үлесі өлшеусіз. Қолдарыңызға дерт бермесін, — деп ақ тілегін жолдады Асқар Жакулин атындағы қайырымдылық қорының директоры Гүлнар Сейдолла.
Семей қаласының Ядролық медицина және онкология орталығының ұжымы науқастардың сауығып кетуіне қосқан үлестері үшін Асқар Жакулин атындағы қайырымдылық қорына ризашылықтарын білдіріп, алхыс хат табыс етті.
Ал қайырымдылық қоры жақында жарық көрген Жайна Жакулинаның «Шексіз махаббат» атты туындысын сыйлады. Бұл шығарма Асқар мен Жайнаның танысқан күнінен бастап жазылған 29 күнделіктен тұрады.
Құралай ҚАЙЫРЖАНҚЫЗЫ, {jcomments off}«Семей таңы»
