Қазақстанда желтоқсан айының әрбір үшінші жексенбісінде Энергетиктер күні аталып өтеді. Мерекеге орай Қалалық Мәдениет сарайында еліміздегі ірі кәсіпорындардың бірі «Шығыс Қазақстан Аймақтық энергетикалық компаниясы» мекемесінің үздіктерін марапаттау салтанаты өтті. Іс-шараға Семей қаласының әкімі Ермак Сәлімов, «ШҚ АЭК» АҚ-ның директорлар кеңесінің төрағасы Шалқар Нұртілеуов және «ШҚ АЭК» АҚ басқармасының төрағасы Ерлан Киркинбаев, сондай–ақ аталмыш сала қызметкерлері мен ардагерлері қатысты.
{jcomments off}Бүгінгі қоғам өмірін электр жарығынсыз елестету мүмкін емес. Иә, кез келген мемлекеттің күш-қуатының басты көрсеткіштерінің бірі саналатын энергетика ел экономикасының базалық саласы болып табылады. Оны экономиканың күре тамыры, тірегі деуге әбден лайық. Міне, халыққа жарық пен жылу сыйлайтын энергетиктердің кәсіби мерекесі қаламызда кең көлемде аталып өтті. Салтанатты жиынға қатысқан қала әкімі Ермак Сәлімов сала қызметкерлерін мерекелерімен құттықтады.
— Ардақты ағайын, құрметті энергетика саласының қызметкерлері! Сіздердің қоғам мен адамзат алдындағы еңбектеріңіз орасан зор, қызметтеріңіз құрметке лайық. Себебі әрбір адамның, барлық мекемелердің тұрақты қызмет етуі энергетик мамандарға тікелей байланысты. Төл мерекелеріңіз құтты болсын! Баршаңызға жақсылық, отбасыларыңызға амандық, шығармашылық табыс тілеймін. Аспанымыз ашық болсын,- деді қала әкімі Ермак Бидахметұлы.
Алқалы жиынның ресми бөлігінде «ШҚ АЭК» АҚ-ның директорлар кеңесінің төрағасы Шалқар Нұртілеуов еңбегімен ерекшеленген сала мамандарына «Мінсіз қызметі үшін» медалін және бағалы сыйлықтар — смарт теледидарлар тарту етті. «ШҚ АЭК» АҚ басқармасының төрағасы Ерлан Киркинбаев «ТМД-ның еңбек сіңірген энергетигі», Қазақстан электр энергетикасы қауымдастығының «Құрметті энергетик» наградаларын және «Еңбек сіңірген энергетик» төсбелгілерін табыстады. Сондай-ақ «ШҚ АЭК» АҚ-ның қызметкерлері кәсібилігі әрі көп жылғы адал еңбектері үшін «100 жыл Семей электр желісі» медалімен марапатталды.
Семей қаласы «ШҚ АЭК» АҚ-ның басшысы Бауыржан Смағұловтың айтуынша, Семей электр желісінің құрылғанына 100 жыл толып отыр. Мереке кезінде «ШҚ АЭК» компаниясы игілікті істерден де тыс қалған жоқ. «Жетім көрсең, жебей жүр» демекші, жетім және ата-анасының қамқорлығынсыз қалған балаларға арналған Шығыс Қазақстан облыстық мектеп-интернат тәрбиеленушілеріне, Семей қаласының қарттар мен мүгедектерге арналған жалпы үлгідегі медициналық – әлеуметтік мекемесіне қажетті заттар мен сыйлықтар тарту етті. Сонымен қатар іргетасы 2012 жылы «ШҚ АЭК» АҚ компаниясының демеушілігімен қаланған «Ажар» балабақшасына да жылдағы дәстүр бойынша компания атынан бағалы сыйлықтар табысталды.
Шараның салтанатты бөлігінен кейін көпшілік назарына мерекелік концерт ұсынылды. Ұлттық музыка ойналып, мың бұралған бишілер өз өнерлерін ортаға салды.
Қуандық НӘСІПБЕКОВ, «Семей таңы»
