Бейсенбі, 20 желтоқсан күні қалалық әкімдік ғимаратында өткен қоғамдық тыңдауда Семей қаласының Бас жоспары талқылынды. Қаланың Бас жоспарын жүзеге асырушы бас мердігер «Градо» ЖШС-нің директоры Әркенжан Мәметов қала әкімінің орынбасары Николай Ушаков пен арнайы жиналған БАҚ өкілдеріне жобаға енгізілген өзгерістер жайында кеңінен баяндады.
Семей қаласының Бас жоспары 2008 жылы әзірленіп, 2011 жылы Үкімет қаулы-сымен бекітілеген болатын. Әзірленген жаңа карта он жыл ішіндегі өзгерістерді ескере отырып жасалған. Яғни шаһардың жаңа топографиялық картасы даярланып, инженерлік желілер мен салынған әлеуметтік нысандардың құрылысы айқындалған. Бүгінде елімізде цифрландыруға көшу басты міндеттердің бірі болып отыр. Сондықтан қала құрылысы бойынша мәліметтерді электронды түрде жасау жоспарлануда.
— Біз бұл жоспарда тек жаңа аумақтарды ғана қарастырып қойған жоқпыз. Бұған дейін әзірленген нақты жоспар жобаларының барлығын ескере отырып жасадық. Қоғамдық көлікке қатысты мәселелерді шешуге тырыстық. Жалпы, жоба бойынша қаланың орталық бөлігіне біртіндеп өзгеріс енгізілетін болады,- деді «Градо» ЖШС директоры Әркенжан Мәметов.
Қаланың Бас жоспарын жүзеге асырушы мердігердің айтуынша, жобада шаһардағы тарихи тұрғыдан құнды объектілерді мүмкіндігінше сақтап қалу көзделген. Сондай-ақ негізгі магистральдар бойынша біраз кеңейту жоспарланған.
— Барлық жоспарларды әзірлеу барысында ескеретін басты мәселенің бірі — тұрғындарға ыңғайлы болуы үшін қоғамдық көлікке қолдау көрсету. Сондықтан, Астана мен Алматы қалаларындағыдай, бізде де қоғамдық көліктер үшін жолақ белгілер жасалады, — деді Әркенжан Мәметов.
Сондай-ақ жобада бос аумақтар да қарастырылған. Мысалы, болашақта Ертіс өзені арқылы өтетін үш көпірдің ұзақ мерзімді құрылысына арналған орындар белгіленген. Екі өткелді Бейбітшілік аралы арқылы салу жоспарланған, үшіншісі айналмалы автомагистраль өтетін қаланың оңтүстік-батыс бөлігінде салынбақ. Қазірде аталмыш айналма жолдың құрылысы бойынша техникалық-экономикалық негіздеменің әзірлемесі жасалуда.
Құралай ҚАЙЫРЖАНҚЫЗЫ, «Семей таңы»{jcomments off}
