21 желтоқсан күні қалалық әкімдікте қалалық мәслихаттың кезекті сессиясы болып өтті.
Семей қаласының 2019-2021 жылдарға арналған бюджеті жайлы экономика және бюджетті жоспарлау бөлімі басшысының міндетін атқарушы Елена Кузнецова баяндады. Елена Кузнецованың айтуынша, Семей қаласының 2019 жылға арналған бюджет көлемі 55,9 млрд. теңгені құрайды.
Оның ішінде республикалық бюджет есебінен 6,2 млрд. теңге сомасында трансферттер мен кредиттер қарастырылған: білім беру жүйесі мен әлеуметтік салаға, Тихомировская тармағы ауданындағы кәріз дюкерін қайта жаңартуға 400 млн. теңге, Қарағайлы ауданындағы 9 қабатты көп пәтерлі тұрғын үйлердің құрылысына 20 жоба әзірлеуге 652, 2 млн. теңге, Ақсай кентінің сумен жабдықтау желілерінің құрылысына 844,4 млн. теңге, Комсомол кентіндегі жеке тұрғын үйлерге кварталішілік электр желілерін тартуға 622,9 млн. теңге, Ұшақтар кентіне 615,5 млн. теңге бөлінген.
Ал облыстық бюджет есебінен қарастырылған 25,2 млрд. теңге «Абай Арена» мәдени-спорттық кешенінің құрылысын жалғастыруға (18,2 млрд. теңге), елді мекендерді абаттандыруға, Комсомол кентін сумен жабдықтауға, Қарағайлы ауданынан 9 қабатты 72 пәтерлі тұрғын үй құрылысын салуға және инженерлік желілерді тартуға, «Затон» су тоғаны мен су құбыры желілерін қайта жөндеуден өткізуге және облыстық бюджеттің ішкі көздерінің қаражаты есебінен Қарағайлыдан 10 тұрғын үйдің құрылысын салуға жұмсалмақ.
— Нөсер кәріз жүйесіне жөндеу жұмыстарын жүргізу мен күтіп ұстауға 2017 жылы 107 млн. теңге, 2018 жылы 96 млн. теңге, 2019 жылы 211 млн. теңге бөлініпті. Байқағанымыздай, биылғы жылы бөлінген сома жылдағыдан екі есеге артық. Мұның себебі не?- деген сұрақ қойды депутат Қайрат Мирашев экономика және бюджетті жоспарлау бөлімі басшысының міндетін атқарушы Елена Кузнецоваға.
— 13 көшедегі нөсер кәріз жүйесіне ағымдағы жөндеу жұмыстарын жүргізуге 180 млн. теңге, жаңбыр су құдықтарын тазалауға 28,7 млн. теңге және Қайым Мұхамедханов көшесіндегі жаңбыр су құдықтарын шаюға 2 млн. теңге бөлінді, — деп жауап берді Е.Кузнецова.
Семей қаласы білім бөлімінің Қазақстан Республикасында білім беруді және ғылымды дамытудың 2016-2019 жылдарға арналған мемлекеттік бағдарламасын жүзеге асыру жөніндегі жұмысы туралы қалалық білім бөлімінің басшысы Наталья Фесенко айтып берді.
Жадыра ТӨЛЕГЕНҚЫЗЫ, «Семей таңы»{jcomments off}
