ҚР Тәуелсіздігі күні қарсаңында қаламыздағы №{jcomments off}49 жалпы білім беретін мектепте «Самұрық-Қазына Траст» компаниясы және «Дара» қайырымдылық қорының бастамасымен ерекше білім беруді қажет ететін балаларға арналған психологиялық-педагогикалық түзету орталығы ашылды. Жиынға Семей қаласының әкімі Ермак Сәлімов, «Самұрық — Қазына Траст» әлеуметтік жобаларды дамыту қорының Корпоративтік коммуникациялар департаментінің директоры Мирас Іргебаев, «Дара» қайырымдылық қорының мүшесі Сәуле Бексұлтанова, ШҚО Білім басқармасы басшысының орынбасары Айгүл Байжанова, Семей қаласы білім бөлімінің басшысы Н.Фесенко және ата-аналар мен оқушылар қатысты.
Дамуында ауытқуы бар балаларды түзетумен айналысатын мекеменің жұмысымен танысқан шаһар басшысы Ермак Сәлімов орталықтың маңыздылығына тоқталды.
— Балалардың өмірін жақсартып, лайықты және табысты болашаққа қол жеткізуге мүмкіндік беру үшін білікті мамандардың көмегі ауадай қажет. Сондықтан да ерекше оқытуды қажет ететін балаларға және олардың отбасыларына жәрдем көрсететін осындай орталық ашылып отыр. Енді бүлдіршіндеріміз білікті мамандардың демеуімен қатардан қалмай тиісті деңгейде білім ала алатын болады. Мұндай орталықтың ашылуы — ата-аналар үшін қуанышты жаңалық. Ұжымға сәттілік тілеймін, балаларымыз ауырмасын,- деді Ермак Бидахметұлы.
Бұл — «Дара» қайырымдылық қоры, ШҚО-ның білім басқармасы, «Samruk-Kazyna Trust» қайырымдылық қорының қолдауымен ашылған облысымыздағы екінші кабинет. Онда дефектолог, психолог, логопед, сурдопедагог, тифлопедагог сынды мамандар қызмет көрсетеді. Ақысыз түрде қызмет көрсететін түзету кабинеті жылына 150 балаға дейін емдеу жұмыстарын жүргізе алады.
Жиын барысында «Дара» қайырымдылық қорының мүшесі Сәуле Бексұлтановаға және «Самұрық — Қазына Траст» әлеуметтік жобаларды дамыту қорының Корпоративтік коммуникациялар департаментінің директоры Мирас Іргебаевқа орталықтың құрылуына сүбелі үлес қосқаны үшін ШҚО әкімінің орынбасары Әсем Бекқызының алғыс хаты тапсырылды. Сонымен қатар ШҚО Білім басқармасы басшысының орынбасары Айгүл Байжанова орталық қызметкерлеріне ноутбук сыйлады. Өз кезегінде Айгүл Байжанова мұндай орталықта дәріс алып, ем қабылдаған науқас балғындардың қатарға тез қосылып кетуіне мол мүмкіндік болатынын айтты.
Айта кетейік, психологиялық–медициналық комиссияның мәлімдемесі бойынша, Семей қаласында екі мыңнан астам ерекше білім беруді қажет ететін жеткіншек бар. Оның ішінде 462 бала денсаулықтарына байланысты біліммен қамтылмай отыр. Жаңадан ашылған орталықта көмекке зәру жеткіншектерге барынша қолдау көрсетілетін болады.
Қуандық НӘДІРБЕКҰЛЫ, «Семей таңы»
