27 желтоқсан күні Балалар мен жастардың шығарма-{jcomments off}шылық сарайында қала әкімінің жаңа жылдық шырша мерекесі тойланып, 150 оқушының басын қосты.
Жетім және ата-анасының қамқорлығынсыз қалған, сондай-ақ аз қамтылған және көп балалы отбасылардан шыққан балаларға арналған қала әкімінің жаңа жылдық шыршасы жылдағы дәстүрге сай биыл да ерекше ұйымдастырылды. Қала мектептерінен бөлек, Семейге қарасты ауылдық округтерден келген 30 бала мерекелік сауық кешін тамашалап, сыйлықтар алды.
Алдымен балалар көгілдір экран арқылы Елбасының жаңа жылдық құттықтауын тыңдады:
— Қымбатты балалар! Бүгінгі Жаңа жыл шыршасына еліміздегі үздік оқитын өнерлі өрендер жиналып отыр. Мен сендерді және еліміздің барлық балаларын мерейлі мерекемен шын жүрегімнен құттықтаймын! Бұл өздеріңді жаңа арманға жетелейтін, жаңа үміт сыйлайтын ерекше мейрам. Жаңа жыл шыршасын бүкіл балалардың жыл бойы асыға күтетіні бекер емес. Кез келген перзенттің аппақ көңілі бұл күні айтылатын ақжолтай тілектердің орындалатынына сенеді. Шырша тойында өнер көрсетіп, сыйлық алатын бүлдіршіннің қуанышынан артық ештеңе жоқ.
Балалардың алаңсыз әрі бақытты өмір сүруі үшін біз барлық жағдайды жасап келеміз. Сондықтан бәрің де саналы тәрбие мен сапалы білім алуға ұмтылуларың керек. Бүгінде дүние жүзі тәуелсіз Қазақстанның жарқын жетістіктеріне құрметпен қарайды. Осындай мәртебелі мемлекетте, еркін елде өсіп жатқан сендер бақыттысыңдар. Өзгеге үлгі болатын өнегелі өреннің болашағы зор екенін әрдайым естен шығармаңдар. Бал дәурен балалықтың бақыты мен шаттығына бөленіп, өсіп-өркендей беріңдер! Жаңа жылдарың құтты болсын!- деді Елбасы құттықтауында.
Мерекелік кеш барысында балалар жаңа жылдық қойылымды тамашалап, ертегілер әлеміне саяхаттады. Шара соңында бүлдіршіндерді қала әкімі Ермак Сәлімов құттықтап, түрлі жаңа жылдық сыйлықтар, тәттілер мен ойыншықтар, қысқы киімдер мен спорттық костюмдер табыс етті.
Айта кетейік, «Жан жылуы» акциясы аясында Семейге қарасты ауылдық округтерден келген 140 бала 21 желтоқсан күні Достық үйінде өткен шырша мерекесіне қатысты.
Жадыра ТӨЛЕГЕНҚЫЗЫ, «Семей таңы»
