Жаңа жылды жақсы қарсы алу үшін жаңа жылдық іс-шараларды өткізу кезінде өрт қауіпсіздігі ережелерін сақтау өте маңызды. Сәрсенбі, 26 желтоқсан күні шаһарымызда Жаңа жыл мерекесі қарсаңында жүргізіліп жатқан дайындық жұмыстары жөнінде есеп беру мақсатында Семей қалалық ТЖБ басшысының орынбасары Бақытбек Байбуров және Cемей мемлекеттік өртке қарсы бақылау бөлімінің басшысы Ернар Жалелов пен Семей қаласы ТЖБ азаматтық қорғаныс бөлімінің басшысы Қымбат Көпбаев БАҚ өкілдерімен брифинг өткізді.
Кездесу барысында өрттің алдын алу шаралары мен қауіпсіздік ережелерін сақтау, балалардың пиротехникалық бұйымдарды қолдану кезінде ата-аналарының назарында болуы, кәмелет жасқа толмаған жас жеткіншектерге құрамында жарылғыш заттар бар пиротехникалық бұйымдарды сатуға тыйым салынғаны және заңды бұзғандар жауапкершілікке тартылып, айыппұл төлеуге міндеттелетіні туралы айтылды.
Cемей мемлекеттік өртке қарсы ба{jcomments off}қылау бөлімінің басшысы Ернар Жалеловтің айтуынша, жаңа жылдық мереке өтетін әкімшілік нысандарға ерекше жауапкершілік жүктеледі. Сол себепті қаламыздағы 43 мектеп пен Қалалық Мәдениет сарайы мен Жастар шығармашылық сарайында, сондай–ақ Абай атындағы театрда алдын ала тексеру жұмыстары жүргізілген.
Жаңа жыл жақындаған уақытта сертификатталмаған фейерверктер мен түрлі түсті электр шамдары аялдамалар мен көшелерде заңсыз сатыла береді. Осы олқылықтардың алдын алу мақсатында рейдтер жүргізіліп, қадағалау күшейтілді. Тексеру кезінде өнім сапасына, сертификаттардың бар болуына, сақтау қағидаларына және сауда орындарының нормативтік құжаттардың талаптарына сәйкес болуына ерекше көңіл бөлінеді.
Кез келген жерде пиротехникалық заттардың сатылуы заңға қайшы әрекет екендігін естен шығармағанымыз абзал.
Иә, өрттің тілсіз жау екені белгілі. Қай кезде тұтанып, қай жерден бастау алатыны да белгісіз. Семей қаласының Төтенше жағдайлар басқармасының қызметкерлері қала тұрғындарын мейлінше сақтық танытып, өрт бола қалған жағдайда, 112, 101 нөмірлеріне тез арада хабарласуларын сұрайды.
Қуандық Нәдірбекұлы, «Семей таңы»