Шығыс Қазақстан облысы бойынша 2019 жылдың 1 қаңтарынан бастап коммуналдық қызметтерге арналған тарифтердің бағасы төмендейтін болады. Бұл туралы ҚР Ұлттық экономика министрлігі Табиғи монополияларды реттеу, бәсекелестікті және тұтынушылардың құқықтарын қорғау комитетінің ШҚО бойынша департаментінің басшысы Қайрат Оразбаев Қоғамдық кеңес отырысында мәлімдеді.
Мемлекет басшысының халыққа Жолдауында аталған тапсырмаларды іске асыру шеңберінде ШҚО-ның барлық қалалары мен аудандарында коммуналдық қызметтерге арналған тарифтерді төмендету туралы шешім қабылданған. Осыған орай 46 табиғи монополия және қоғамдық маңызы бар нарық субъектілері өздігінен 80 тарифті төмендетті. Нәтижесінде барлық тарифтерді төмендетудің жалпы экономикалық тиімділігі 2,5 млрд. теңгеден асқан. 2019 жылы төмендетілген тарифтер бойынша 82 табиғи монополия субъектілері 117 тариф бойынша жұмыс істейтін болады. Оның ішінде сумен жабдықтау қызметтеріне 58, су тарту қызметтеріне 22, жылумен қамту қызметіне 29, электр энергиясымен қамту және тарату қызметтеріне 8 тариф бар.
— 1 қаңтардан бастап облысымыздағы қалалар мен аудандарда 39 табиғи монополия субъектілерінің 70 тарифі 3 пайыздан 10 пайызға дейін төмендейді. 2018 жылдың 1 тамызынан бастап 22 уақытша төлемді төмендету тарифтері енгізілген болатын. Нәтижесінде 22 бағыт бойынша қызмет тарифтері 1%-дан 21%-ға дейін қысқарып, төлем тарифтерінің жалпы экономикалық тиімділігі 190 млн. теңгеден асты,- деді Қайрат Оразбаев.
Кездесу барысында «Семей — Водоканал» МКК-нің директоры Еркін Сағындықов келер жылдың басында тұрғындарды сумен қамту тарифтері 5 пайызға арзандайтынын айтты.
— Сумен қамту төлемін төмендету электр энергия шығынын үнемдеу арқылы жүзеге асырылды. Таяуда жиілік түрлендіргіш және су есептейтін заманауи жабдықтар орнатылды. 2018 жылдың 1 мамырында біз тарифті 5% — ға көтерген болатынбыз, келер жылдың басында қайта 5% -ға азайтамыз,- деді Еркін Сағындықов.
Сонымен қатар жиында электр энергиясымен қамту мәселесі де айтылды. Себебі жарықпен қамту қызметі төлемінің жиі және күрт өзгеруі тұрғындарды толғандырып отырған сұрақтардың бірі.
— Қауіпсіздік кеңесінде Мемлекет басшысы жарықпен қамтамасыз ету ұйымдарының жұмысын сынға алған болатын. НәтижесіндеЭнергетика министрлігі бүгінде 46 энергия көздері үшін жеті жыл бойы өзгермейтін шектік бағаны бекітті. Яғни енді электр энергиясы қызметінің бағасы жеті жыл бойы тұрақты болады деп ойлаймын,- деді Қайрат Оразбаев.
Қала әкімінің орынбасары Николай Ушаков қатты тұрмыстық қалдықтарды шығару тарифтері жаңа жылда да еш өзгеріссіз қалуы керектігін және коммуналдық қызметтердің өз тарифтерінің құнын көтеруі заңға қайшы екенін айтты.
— Бекітілген тариф бар. Сондықтан олардың өздігінен бағаны көтеруі заңсыз болып табылады. Біз бекітілген тариф шеңберінде жұмыс істеуіміз керек. Кәсіпкерлер ескі тәсілмен жұмыс істеуді тоқтатып, барлық іс-әрекеттерін заңды түрде сауатты жүзеге асыруы қажет, — деді Николай Ушаков.
Сондай-ақ кездесуде Жаңа жыл қарсаңында азық-түлік өнімдерінің бағасын өсіру мәселесі де көтерілді. Департамент басшысының айтуынша, бүгінде азық-түлік тауарларының бағасына күнделікті мониторинг жүргізіледі.
Құралай ҚАЙЫРЖАНҚЫЗЫ, {jcomments off}«Семей таңы»
