Семей қаласының мамандандырылған сәбилер үйіндегі 26 желтоқсан күні өткен жаңа жылдық ертеңгілікке ШҚО денсаулық сақтау басқармасының қызметкерлері келді. Олар балаларға сыйлық жасау үшін мекемедегі Жаңа жыл кешінен бас тартуды ұйғарыпты. Балаларға сыйлық жасау туралы ойды барлық ақ халаттылар қолдаған. Алғашқы жаңа жылдық кешті 60-тан астам бүлдіршін тәрбиеленіп жатқан осы сәбилер үйінде ұйымдастыруды жөн көріпті.
Медицина қызметкерлері ертегі кейіпкерлері бейнесіне еніп, сәбилерге тәтті-дәмділер мен сыйлықтар таратты. Мұндай мерекелік кештер басқа әлеуметтік мекемелерде де жалғасын таппақ.
Сәбилер үйінің аға тәрбиешісі Райхангүл Смағұлованың айтуынша, ертеңгілік 2-5 жас аралығындағы бүлдіршіндер үшін ұйымдастырылып отыр. Биылғы жылы дауна синдромымен ауыратын және аз қамтылған отбасы балаларына арналып ашылған «Үміт» пен «Балауса» топтарының тәрбиеленушілері аталған шараға алғаш рет қатысып отыр екен.
Балғындарды Жаңа жылмен құттықтауға, денсаулық сақтау басқармасы қызметкерлерімен қатар, тұрақты демеушілері «Алел» АҚ, «КазХимТехСнаб» компаниясы, «Қаражыра» ЖШС, «Supreme» орталығы және Ж.Шайжүнісов атындағы колледж ұжымдарының өкілдері де келіпті.
Жадыра Төлегенқызы, «Семей таңы»{jcomments off}
