24 желтоқсан күні Семей қаласының әкімі Ермак Сәлімов қысқы спорт түрлеріне арналған Мұз сарайын салу мәселесі бойынша жауапты сала басшыларымен және тиісті кәсіпорын жетекшілерімен кеңес өткізіп, жаңа жобаны таныстырды.
Облыс әкімі Даниал Ахметовтің бастамасымен салынатын Спорт сарайы алдағы уақытта Қарағайлы ықшам ауданындағы Назарбаев Зияткерлік мектебінің жанынан бой көтереді.
Спорт сарайында хоккей, шорт-трек, мәнерлеп сырғанау, керлинг, конькимен жүгіру сайыстарын және басқа да жарыстарды өткізуге болады. Сонымен қатар жылдың қай уақытында болмасын мұндағы қосымша залдарда қысқы спорт түрлерінен жаттығулар өткізуге барлық жағдай қарастырылады.
— Қысқы спорт түрлерін дамытуда және спортшылардың жаңа белестерді бағындыруына жақсы қолдау болады, себебі қаланың спорт саласындағы мүмкіндігі зор,- деп атап өтті қала басшысы.
Жобаны астаналық «Medeo Invest» ЖШС жүзеге асыратын болады.
Бұл нысанның салынуы қала тұрғындары үшін өте маңызды екенін айтқан қала әкімі Ермак Сәлімов барлық жауапты бөлім басшыларына жобаны жүзеге асыру үшін қысқа мерзім ішінде келісімдер жүргізіп, 2019 жылдың жазында құрылысты бастауды тапсырды.
{jcomments off}Қала әкімінің баспасөз қызметі.
