Өткен жұмада Электротехника колледжінде Құзыреттілік орталығының ашылды. Іс-шараға ШҚО Білім басқармасы басшысының орынбасары Қажымұқан Оспанғалиев, Электротехника колледжінің директоры Азат Сарпеков, сондай-ақ Өскемен құрылыс колледжінің директоры Николай Токарев пен «АЭС Шульба ГЭС» ЖШС директоры Асқар Балабатыров және колледж студенттері қатысты.
Жаңа мекеменің лентасын қию құрметі жуырда өткен «Worldskills Kazakhstan — 2018» чемпионатының «Мехатроника» саласы бойынша жеңімпаздары, Электротехника колледжінің студенттері Александр Бетцольд және Исажан Раисовқа берілді.
Құзыреттілік орталығы, негізінен, жеті бағыт бойынша жұмыс істейтін болады. Атап айтар болсақ, мұнда мехатроника, графикалық дизайн, инженерлік графика, желілік және жүйелік әкімшілік, өндірістік автоматика, электромонтаждау мен дәнекерлеу ісі бойынша мамандар даярланады. Орталықты заманауи техникамен жабдықтау үшін облыстық бюджеттен 210 миллион теңге бөлінген. Алынатын құрал-саймандар өндірістік нысандардың талаптарына сай келуі үшін әлеуметтік серіктес кәсіпорындармен келісілді. Бұл орталықта оқытушылар да өз біліктіліктерін арттырады.
Құзыреттілік орталығының мақсаты жайлы Шығыс Қазақстан облысы Білім басқармасы басшысының орынбасары Қажымұқан Оспанғалиев айтып өтті.
— Бұл орталықта әлемдік деңгейдегі оқу үрдісінде қолданылатын стандарттар енгізілген. Орталық тек Электротехника колледжінің студенттері үшін ғана жұмыс істемейді. Осы базада ШҚО-ның басқа да колледждері аталған мамандықтар және бағыттар бойынша келіп дайындалатын болады. Олар сонымен қатар Worldskills чемпионатына дайындық жұмыстарын жүргізеді, — деді Қажымұқан Оспанғалиев.
Жиын барысында Электротехника колледжі оқытушылары оқу-әдістемелік кешенді жүйелеу және электрондық құралдарды құрудағы тәжірибелерімен бөлісті.
Сонымен қатар IT — орталықтың инновациялық қызметі бойынша заманауи өндірістің жаңа технологиялары, сондай–ақ жаңа дәнекерлеу және электромонтаждау жабдықтарының жұмысы көрсетілді.
Қуандық НӘДІРБЕКҰЛЫ, {jcomments off}«Семей таңы»
