Сенбі, 12 қаңтар күні қала әкімі Ермак Сәлімов Қарағайлы ықшам ауданына барып, салымшылармен кездесу өткізді.
Семейде 200,3 гектар аумақты алып жатқан Қарағайлы атты жаңа ауданның пайда болғанынан оқырмандарымыз хабардар. Аталған ауданда құрылыс жұмыстары қарқынды жүруде. Назарбаев Зияткерлік мектебі мен мемлекеттік-жекеменшік серіктестік аясында салынған 1020 орынға арналған балабақша жұмыс істеп тұр. 5 мың орындық бірегей «Абай Арена» мәдени-спорт кешені салынуда.
Алдымен шаһар басшысы Ермак Сәлімов «Абай Арена» мәдени-спорт кешенінде Қарағайлыдан пәтер сатып алуға ниетті Тұрғын үй құрылыс жинақ банкінің салымшыларымен кездесіп, ауданның бас жоспарымен таныстырды.
— Осы уақытқа дейін тұрғындардың көбі Қарағайлы ықшам ауданы жайлы әртүрлі пікірлер айтып келгені рас. Ауданның шетте орналасқанын, инфрақұрылым желілері тартылмағанын алға тартатын. Ал қазір жағдай басқаша сипат алып келеді. Жылу, жарық, су, кәріз жүйесі, телефон желісі тартылды. 127 көп қабатты тұрғын үймен бірге жол да салынады. Алдағы уақытта Қарағайлыда 25 мың халық тұрады деген жоспар бар,- деді Ермак Сәлімов.
Ермак Бидахметұлы кездесу барысында заманауи ауданның тұрғыны болудың артықшылықтары жайлы айтып өтті. Ең бастысы, жаңа ықшам ауданда балалардың сапалы біліп алып, жан-жақты дамуына барлық жағдайлар қарастырылып отыр.
— «Абай Арена» кешенінде халықаралық деңгейдегі спорттық жарыстар, концерттер мен мәдени шаралар ұйымдастырылатын болады. Сондай-ақ осы аумақтан ерекше фонтан салуды көздеп отырмыз. Нысан биылғы жылдың соңына дейін пайдалануға беріледі. Мамыр айында қысқы спорт түрлеріне арналған Мұз сарайының құрылысы басталады. Мұнда хоккей корты, шорт-трек, мәнерлеп сырғанау, керлинг, коньки және басқа да спорт түрлерінен жаттығуға болады. Сондай-ақ Қарағайлыда Жастар орталығын, 4 мектеп пен 5 балабақша салу жоспарымызда бар. Биылғы жылы жобалық-сметалық құжаттарды әзірлеумен айналысамыз. Жедел медициналық жәрдем ауруханасына, Энергетик кентіне апаратын жолдар және республикалық маңыздағы Павлодар тас жолы жөнделеді. Бір сөзбен айтқанда, Қарағайлының болашағы зор, — деген Ермак Бидахметұлы тұрғындарды аталған ауданнан пәтер сатып алуға шақырды.
Қарағайлыда көп қабатты тұрғын үйлер «7-20-25» бағдарламасы бойынша Тұрғын үй құрылыс жинақ банкі және екінші деңгейлі банктер арқылы берілуде. Үйдің жайлылығына байланысты пәтерлердің шаршы метрінің құны да әртүрлі.
Жиын барысында салымшылар алғашқы 20 пайыз жарнаны жинаудың өзі қалтаға едәуір салмақ салып отырғанын ашып айтты. Осыдан соң Ермак Бидахметұлы банк өкілдерімен және салымшылармен әкімдік ғимаратында кездесу өткізіп, сауалдарына жауап берді.
— Пәтер бағасын арзандату туралы бастама көтеріп жатырмыз. Мәселен, шаршы метрі 160 мың теңге тұратын болса, 140 мыңға дейін төмендетуге болады. Келесі жұмада шешім шығады. Сол кезде барлығыңызға хабарлаймыз,- деп қорытындылады жиынды Ермак Бидахметұлы.
Жадыра ТӨЛЕГЕНҚЫЗЫ, «Семей таңы»{jcomments off}
