Р.Байсейітов атындығы Семей қаржы-экономикалық колледжінде қазақ күресінен облыстық «Колледж Барысы» турнирі болып өтті. Қазақ күресін дәріптей отырып, жастарды отансүйгіштікке баулу, ұлттық рухын көтеріп, жас палуандардың спорттық шеберліктерін арттыру мақсатында ұйымдастырылған сайысқа кәсіптік және техникалық білім беретін ұйымдардан 43 студент қатысты.
Қазақ күресі турниріне ҚР-ның еңбек сіңірген бапкері, 4 дүркін әлем чемпионы, 2 дүркін «Әлем барысы», 2013 жылы «Қазақстан Барысы» атанған Айбек Нұғымаровтың жаттықтырушысы Серік Қоржыкенов, Семей қаласы әкімдігі спорт бөлімінің басшысы Мұрат Құржықаев, ШҚО Күрес федерациясының вице-президенті Амант{jcomments off}ай Қазымов, ШҚО білім басқармасы Облыстық қосымша білім беру және дене шынықтыру орталығының дене шынықтыру, спорт және туризмді дамыту бөлімінің басшысы Дина Алимханова қонақ ретінде шақырылды.
Р.Байсейітов атындағы колледж директоры Думанғазы Семейғазыұлы спортшыларды қарсы алып, барлығына сәттілік пен жеңіс тіледі. Өрендердің ұлттық спортқа деген қызығушылықтарын, тиянақты дайындықтарын көріп, ізгі ниетін білдірді.
Турнир қорытындысына сәйкес, 80 кг салмақ дәрежесі бойынша Еуразия колледжінің студенті өгіз палуан Ибраев Сұңқар 1-ші орынды жеңіп алса, жүлделі екінші және үшінші орындарға Мұхтар Әуезов атындағы педагогикалық колледждің студенті Қаршыға Барлықанов, Көлік колледжінің студенті Әшім Ерболат және Электротехникалық колледждің студенті Әсет Төлеубеков ие болды.
80 кг — нан жоғары салмақ дәрежесі бойынша Көпсалалы колледж студенті Әділ Төкешов түйе палуан атанса, жүлделі екінші, үшінші орындарға Көпсалалы колледж студенті Айбек Ағыбаев, Құрылыс колледжінің студенті Алмас Окусукпаев, Спорт колледжінің студенті Дарын Бейісханов ие болды.
Жарыс жеңімпаздары бағалы сыйлықтармен, кубоктармен марапатталып, «Түйе палуан» атағының иегері Әділ Төкешовке «Колледж барысы» белбеуі табысталды.
М.ТӨКЕНҰЛЫ, Р.Байсейітов атындағы қаржы-экономикалық колледжі.
