Мұғалімдер, тәрбиешілер мен балабақшадағы өзге қызметкерлердің еңбекақысын көтеру мақсатында елімізде аттестацияның жаңа үлгісі енгізілді. Осыған орай Семейде 300-ден астам ұстаз біліктіліктерін қорғаған. Бұл ретте ұстаздар мен педагогтердің жалақысы аттестация барысында қорғаған санатына сәйкес көтерілмек. 4 санатты қамтитын тестілеу Семейде де сәтті жүзеге асуда.
Білім бөлімінің мәліметінше, Семейде 4 мыңнан астам мұғалім бар. Педагогикалық қызметкерлер аттестациясының жаңа үлгісі әзірге тек мұғалімдер арасында ғана жүргізілуде. Ал балабақша тәрбиешілері үшін тестілеудің жаңа үлгісі дайындық үстінде. Сол себепті олар біліктіліктерін ескі жүйе бойынша сынап, бұрынғы тарифпен қосымша үстеме алуда.
Былтырғы жылы педагогтер арасында өткен алғашқы ұлттық тестілеуге 322 мұғалім қатысқан. Тестілеуден жоғары көрсеткіш көрсеткендерге {jcomments off}1 қыркүйектен бастап қосымша айлық қосылды.
— «Педагог — шебер» санатын алған мұғалімдерге 50 пайыз, «педагог — зерттеушіге» 40 пайыз, «педагог — сарапшыға» 35 пайыз, ал «педагог – модератордың» жалақысына 30 пайыз үстемеақы қосылады. Әзірге бұл жаңашылдық тек қала мектептерін қамтиды. Қараша айында өткен екінші тестілеудің нәтижесі бұрынғыдан жоғары болды,- дейді қалалық білім бөлімінің бас маманы Ғалия Нұрғалиева.
Алғашқы тестілеуде мұғалімдердің 63 пайызы ғана жақсы нәтиже көрсетсе, екінші сынақтан 73 пайызы сүрінбей өткен. Тестілеу нәтижесі бойынша, 12 педагог – шебер, 120 педагог — зерттеуші, 99 педагог – сарапшы мен 109 педагог – модераторға қызметтік еңбекақыдан бөлек үстемақы төленеді.
— Аттестация 5 жылда бір рет өткізіледі. Яғни әрбір мұғалім 5 жылда бір рет міндетті түрде тестілеуден өтуі керек. Егер ұстаздар өздерінің жетістіктеріне сенімді болса, тестілеуді мерзімінен бұрын тапсырып, жалақысына қосымша үстеме алуына мүмкіндік жасалған. Бұл мектепке дейінгі білім беру мекемелерінің педагогтеріне де қатысты. Олар да мұғалімдер сынды бес жылда бір немесе мерзімінен бұрын сынақтан өтуге құқылы,- дейді Ғ.Нұрғалиева.
Белгілі бір санатты қорғаған ұстазға қойылатын талап та әртүрлі. Бірінші санаттағы мұғалім сабақ беру әдістемесі мен бағалауды меңгеруі керек. Екінші санаттағы ұстаз, яғни модератор педагогтің білім берудегі инновациялық әдістемемен жұмыс жасай білуі қажет. Ал жоғары санаттағы педагогтердің еңбек өтілі 4 жылдан кем болмауы керек және жетістіктері Алматы, Астана қалалары көлемінде болуы шарт. Халықаралық, республикалық олимпиадалар мен байқауларға оқушылар дайындап, авторлық оқу-әдістемелік құралдарын шығарған немесе авторлық бағдарлама әзірлеген ұстаздарға ең жоғары – «педагог — шебер» санаты беріледі.
«СТ-ақпарат»
