Сәрсенбі, 16 қаңтар күні өзін-өзі жұмыспен қамтыған халықтың қызметін формализациялау және әлеуметтік қамсыздандыру жүйелеріне қатысуын қамтамасыз ету мақсатын көздейтін бірыңғай жиынтық төлем жүйесін түсіндіруге арналған брифинг өтті. Жиында мәлім болғандай, 2019 жылдың 1 қаңтарынан б{jcomments off}астап Қазақстанда бірыңғай жиынтық төлем енгізілді.
Басқосуда Семей қаласы әкімінің орынбасары Надежда Шарова, Бірыңғай жиынтық зейнетақы қорының өкілдері мен салық заңнамасын түсіндіру бөлімінің өкілдері бірыңғай жиынтық төлемнің қалай жүзеге асатыны туралы жан-жақты түсіндіріп өтті. Бүгінде өзін-өзі жұмыспен қамтығандар, ресми статистика бойынша, елімізде шамамен 1,4 миллион, ал қаламызда 27 мың адамды құрайды екен. Жаңа жүйені енгізу тұрғындарға бір төлеммен бірнеше міндетті жарнаны — міндетті әлеуметтік медициналық сақтандыру жарнасын, зейнетақы қорына түсетін төлемді, жеке табыс салығы мен әлеуметтік сақтандыру жарнасын төлеуге мүмкіндік береді.
— Бірыңғай жиынтық төлем қаламыз үшін айына 1 263 теңгені құрайды. Бұл ең төменгі айлық жалақының 0,5 пайызы. Республикалық маңызы бар қалалар және облыс орталықтарында 2525 теңгені құрайтын болады,- деді қала әкімінің орынбасары Н.Шарова.
Жинақтық төлемді азаматтар қызмет көрсетілген айдан бастап ай сайын төлеп отыруға міндетті. Бірыңғай жиынтық төлемді қаламыздағы Халық Банкі, Forte, Цеснабанк, ЦентрКредит банкі және «Қазпочта» АҚ кеңселерінде жүзеге асыруға болады.
— Бірыңғай жиынтық төлемді (БЖТ) төлеушілер – жалдамалы жұмысшылардың еңбегін пайдаланбайтын, тек жеке тұлғаларға қызмет көрсететін өзін-өзі жұмыспен қамтыған азаматтар. Сондай-ақ жеке қосалқы шаруашылығындағы ауылшаруашылық өнімдерін саудалайтын тұлғалар да бірыңғай жиынтық төлемді төлеушілер қатарына жатады,- деп нақтылап өтті заң қызметі және салықтық заңнаманы түсіндіру бөлімінің басшысы Шырын Амирханова.
Жалпы алғанда, Бірыңғай жиынтық төлемді енгізу бейресми жұмыспен қамтылғандарға: Міндетті әлеуметтік медициналық сақтандыру жүйесіне қатысуға және сомасы мен түрлері шектелмеген медициналық қызметтерге қол жеткізуге, медициналық мекемелерді таңдауға; жинақтаушы зейнетақы жүйесіне қатысуға әрі жүйеге қатысу өтіліне қарай базалық зейнетақы төлемін алуға; еңбек ету қабілетінен, асыраушысынан айырылған жағдайға, жүктілік пен босануға, бала асырап алуға, бала 1 жасқа дейін оның күтіміне байланысты әлеуметтік төлемдер алуға мүмкіндік береді. Түзетулердің екінші блогы “өзін-өзі жұмыспен қамтыған адам” анықтамасына әртүрлі түсінік беруді жоюға бағытталған. Терминдерді бірыңғай қолдану үшін “жұмыспен қамтылған адам”, “жалдамалы жұмыскер”, “тәуелсіз жұмыскер” анықтамалары ұсынылады.
Құралай ҚАЙЫРЖАНҚЫЗЫ, «Семей таңы»
