Semeytany.kz – Семей қаласының Шығыс кентінде «Келешек мектептері» ұлттық жобасы аясында салынған №53 жалпы орта білім беретін жаңа мектеп пайдалануға берілді.
Жаңа білім ордасының ашылу салтанатына Абай облысының әкімі Берік Уәли, Оқу-ағарту вице-министрі Жайық Шарабасов, Парламент Сенатының депутаттары Қайрат Тастекеев пен Айнұр Арғынбекова, Мәжіліс депутаттары Ринат Зайытов пен Мақсат Толықбай, сондай-ақ Қазақстанның Еңбек Ері Алма Шүкіжанова қатысты.
300 орынға лайықталған мектеп Шығыс кентіндегі балаларды заманауи жағдайда оқытуға мүмкіндік береді. Бұл – «Келешек мектептері» жобасы аясында Семей қаласында ашылған үшінші, ал Абай облысындағы бесінші мектеп.
Жаңа нысанның жалпы аумағы 2,56 гектарды құрайды. Мұнда 30 оқу кабинеті, екі информатика сыныбы, робототехника кабинеті, химия, физика және биология зертханалары қарастырылған. Сонымен бірге токарлық және металл өңдеу шеберханасы, аспаздық және тігін кабинеттері де жабдықталған.
Мектепте 17 интерактивті панель орнатылған. Сондай-ақ 84 орындық акт залы, 78 орындық асхана, кітапхана мен оқу залы жұмыс істейді. Оқушылар үшін STEM-зертханалар, хореография залы, 673 шаршы метрлік спорт залы және ашық ойын алаңдары бар. Мектеп аумағында футбол, волейбол, хоккей алаңдары мен 400 метрлік жүгіру жолағы орналасқан.
Ерекше білім беруді қажет ететін балалар үшін де барлық жағдай жасалған. Ғимарат ішінде лифт пен тактильді жолақтар қарастырылған.
Салтанатты шара барысында облыс әкімі жаңа мектептің ашылуы өңірдің білім беру саласы үшін маңызды оқиға екенін атап өтті. Оның айтуынша, бұл нысанның іске қосылуы арқылы Шығыс кентіндегі мемлекеттік мектепке қатысты өзекті мәселе толық шешімін тапқан. Енді бұл аумақтағы оқушылардың басқа аудандарға қатынап оқуына қажеттілік жоқ.
Іс-шара кезінде Оқу-ағарту вице-министрі Жайық Шарабасов өңірдің білім саласына ұзақ жылдар еңбек сіңірген ардагер ұстаздар Марияма Битебаева мен Бақыт Кажыбаеваға «Еңбек ардагері» медалін табыстады.
Ашылудан кейін облыс әкімі мен құрметті қонақтар мектеп ішін аралап, сыныптарды көріп, мұғалімдер және оқушылармен пікір алмасты.
Шығыс кентінің тұрғыны Шалқар Хамилаев жаңа мектептің ашылуы жергілікті халық үшін көптен күткен қуаныш екенін айтты. Оның сөзінше, бұған дейін балалар алысқа қатынап оқып, түрлі қиындық көрген.
Қазір облыста мектеп тапшылығын азайту бағытында бірқатар жоба жүзеге асып жатыр. Жарма ауданының Суықбұлақ ауылында бастауыш мектептің құрылысы жалғасуда. Сонымен қатар Семей қаласындағы №4 және №30 мектептерге қосымша ғимараттар салынып жатыр. Абай ауданы Кеңгірбай би ауылындағы Қарашоқы шатқалында балалар лагерінің құрылысы да аяқталуға жақын.
Бұдан бөлек, алдағы жылдары Семейдің Қарағайлы шағын ауданында 400 орындық «Білім-инновация» лицейі мен 1400 орындық мектеп, сондай-ақ Ақсуат пен Екпін ауылдарында 300 орындық екі мектеп салу жоспарланған.
